عالمان د سولې له بهیر څخه ملاتړ کوي
د دیني بنسټونو په استازولۍ یو شمېر علماوو د سولې په چارو کې د دولت وزارت له ستر سلاکار مولوي عبدالرحمان هوتک سره په لیدنه کې د سولې له بهیر څخه خپل ملاتړ اعلان کړ.
دغو علماوو چې له بېلابېلو ولایتونو یې په دغه ناسته کې ګډون کړی و اعلان وکړ چې د سولې په چارو کې د دولت له وزارت سره هر ډول همکارۍ ته چمتو دي او د سولې په برخه کې به هېڅ ډول مرسته نه سپموي.
هغوی ژمنه وکړه چې له دیني بنسټونو سره به په اړیکه کې وي او د سولې بهیر په لړ کې به د خلکو او حکومت د دریځ د ملاتړ لپاره حضوري او غیرحضوري آنلاین ناستې جوړوي.
د سولې په چارو کې د دولت وزارت ستر سلاکار مولوي عبدالرحمان هوتک د دغو علماوو د همکارۍ له اعلان څخه د مننې ترڅنګ د سولې په ټینګښت کې د هغوی رول ارزښتناک وباله. ښاغلي هوتک له علماوو وغوښتل چې په هېواد کې د باعزته او سراسري سولې د ټینګښت د زمینو برابرولو او د سولې په چارو کې د دولت وزارت ته د مشورې ورکولو په برخه کې فعال رول ولوبوي.
په دغه ناسته کې په بېلابېلو لارو د اړیکو او همغږۍ په مېکانېزمونو او په مرکز او زونونو کې د حضوري او غیرحضوري ناستو پر تنظیم، د سولې بهیر په جوړښتونو کې د علماوو پر حضور، د سولې په چارو کې د دولت وزارت او حکومت ته د وړاندیزونو په کولو خبرې وشوې.
د یادولو وړ ده چې له دې مخکې هم د سولې په بهیر کې د علماوو د نظرونو او وړاندیزونو ترلاسه کولو لپاره د سولې په چارو کې د دولت وزارت له خوا ورته غونډې جوړې شوې دي.
