رضاکار ډاکتران د سولې په برخه کې کار کوي
د سولې په چارو کې د دولت وزارت ستر سلاکار ډاکتر میرویس څرګند د سولې لپاره د رضاکارو ډاکترانو له یوې ډلې سره د همغږۍ په ناسته کې د سولې لپاره د رضاکارانه فعالیتونو پر رول ټینګار وکړ.
ښاغلي څرګند په دې ناسته کې وویل: تر څو چې خپله افغانان ونهغواړي او د سولې او پخلاینې د ټینګښت لپاره عملي ګام وانهخلي، سوله به رانهشي.
نوموړي له دغو رضاکارو ډاکترانو مننه وکړه او زیاته یې کړه، دا چې د سولې ټینګښت لپاره ټولیز باور رامنځته شوی نو د داسې رضاکارانو موجودیت ـ چې له هر ډول مالي امتیاز پرته غواړي سولې ته کار وکړي ـ یو ښه زېری دی.
ښاغلي څرګند د خلکو پر یووالي ټینګار وکړ او ویې ویل: «که یوه لویه برخه خلک همفکره وو او په یووالي سره د سولې د پالیسۍ او میکانېزم دفاع وکړو، سوله به هم راشي».
همدارنګه ښاغلي څرګند وویل چې د سولې او جګړې پر ادبیاتو کار کولو ته اړتیا ده. ده ټینګار وکړ چې باید سپک او له کینې ډک ادبیات ونهکارول شي.
یوې رضاکارې تورپېکۍ نوابي د سولې پر اهمیت ټینګار وکړ او ویې ویل چې جګړه د بېوزلۍ، اعتیاد او نورو ټولنیزو ګډوډیو لامل شوې ده. که دا جګړه پای ته ورسول شي، ډېره برخه ټولنیزې ستونزې به هم له منځه لاړې شي.
د نسل خرد انجمن رئیس چمنعلي ساعد د هغې څېړنې په اړه خبرې وکړې چې دغې ادارې د پوهنتونونو د استادانو په همکارۍ سره کړې ده. ده د دغې څېړنې د پایلو پر بنسټ وویل چې خلکو ته د سولې په برخه کې د پوهاوي کلکه اړتیا احساسېږي.
همدارنګه ده ټینګار وکړ چې د سولې د بهیر په اړه برداشتونه او خبرې د خلکو تر منځ بېلابېلې دي؛ اړتیا ده چې په دې برخه کې هم کار او پوهاوی وشي.
د نورستان ولایت یوه اوسېدونکي محمد نوروز قادر د سولې په برخه کې د پوهاوي پر اهمیت خبرې وکړې او ویې ویل د سولې لپاره چې هر اقدام کېږي، باید د خلکو دودونه او باورونه په پام کې ونیول شي. ده همدارنګه ټینګار وکړ چې سولې ته پر کار کولو سربېره اړتیا ده چې ځوانانو ته د دندو رامنځته کولو زمینه برابره شي تر څو له مخالفو ډلو سره یو ځای نهشي.
ټاکل شوې د سولې لپاره رضاکارې ډلې اړو کسانو او بندیانو ته د سیارو طبي خدماتو او وړیا زدهکړو ورکولو په برخه کې کار وکړي. دا بهیر به په نږدې راتلونکي کې په عملي ډول پیل شي.
