د پروان او کاپیسا ولایتونو یو شمېر قومي مشرانو د سولې لپاره د حکومت د اووه مادهييزې طرحې هرکلی وکړ
د سولې په چارو کې د دولت وزارت ستر سلاکار ډاکتر میرویس څرګند د پروان او کاپیسا ولایتونو د چنزهيي، خروټي، ناصري او موسیزي قومونو له یو شمېر مشرانو سره وکتل.
په دې لیدنه کې د سولې د بهیر، بینالافغاني خبرو او د حکومت د اووه مادهييزې طرحې په اړه خبرې وشوې.
د سولې په چارو کې د دولت وزارت ستر سلاکار دغو مشرانو ته د سولې لپاره د حکومت د اووه مادهيیزې طرحې په اړه توضېحات ورکړل او له هغوی یې وغوښتل چې د سولې په بهیر کې له حکومت سره همکاري وکړي.
قومي مشرانو د سولې لپاره د حکومت د اووه مادهييزې طرحې ملاتړ اعلان کړ او د سولې د بهیر په تړاو یې خپلې اندېښنې او وړاندیزونه شریک کړل.
د پروان ولایت د بګرام ولسوالۍ د خروټي کلي ملک حاجي حمیدالله د نامسوولو وسلهوالو کسانو او ډلو شتون د ناامنۍ دلیل او د سولې خنډ وباله او ویې ویل چې دولت باید له دې پدیدې سره د مبارزې لپاره کلک اقدامات وکړي.
همدارنګه د چنزهيي قوم یوه مشر حاجي رضاخان وویل چې ځوانانو ته د کار د امکاناتو نهشتون د مخالفانو لیکو ته د هغوی د ورتلو یو دلیل دی. ده ټینګار وکړ چې دولت باید دې برخې ته پام وکړي.
تر دې وړاندې هم د کابل، لغمان، لوګر او پکتیا ولایتونو یو شمېر قومي مشرانو د سولې لپاره د حکومت د هڅو او اووه مادهييزې طرحې ملاتړ اعلان کړی و.
