مذاکرهلر هیأتینینگ مدني همجمعیت و انسان حقوقلری تشکیلاتلری وکیللری بیلن مصلحت اوچرهشووی
افغانستان اسلام جمهوریتی مذاکرهلر هیأتی اعضالری و مدني همجمعیت تشکیلاتلری وکیللری، اوروش قربانلری حقوقینینگ حمایهچیلری و مهاجرت ایشلری بۉییچه فعالیت آلیب بارووچی تشکیلاتلر اۉرتهسیده تینچلیک ایشلری دولت وزیرینینگ انسان حقوقلری و مدني همجمعیت تشکیلاتلری بۉییچه اۉرین باسری اشتراکیده مصلحت اوچرهشووی بۉلیب اۉتدی.
مذاکره آلیب بارووچی هیأت اعضالریدن محمد ناطقی، شریفه زرمتی وردک و خالد نور اشتراکیده اۉتکزیلگن اوشبو ییغیلیشده، تینچلیک ایشلری بۉییچه دولت وزیرینینگ انسان حقوقلری و مدني همجمعیت تشکیلاتلری بۉییچه اۉرین باسری داکتر عالمهنینگ اَیتیشیچه، اوچرهشوو اشتراکچیلرنینگ فکرلری و تکلیفلرینی آلیش و سۉراقلریگه جواب بېریش اوچون یۉلگه قۉییلگن اېدی.
اوچرهشوو دوامیده مذاکرهلر هیأتی عضوی محمد ناطقی افغانستان تینچلیک مذاکرهلرینینگ بیرینچی باسقیچی حقیده معلومات بېردی. او مذاکره مجلسلری نینگ قۉشمه دستوری بۉییچه بۉلگن بحثلرگه تۉختهلیب اۉتدی و هر ایکّی تامان هم برقرار تینچلیک طرفداری اېکنلیگینی اَیتدی.
جناب ناطقی، شونینگدېک، کون ترتیبی بۉییچه ایشلر باشلنگنینی وایکّله تاماننینگ کون ترتیبیگه دایر قیلگن تکلیفلریده اۉرتاق و فرقلی نقطهلر بارلیگینی اَیتدی؛ شونینگ اوچون کون ترتیبی حقیده بحث آلیب باریشگه کیریش ضرور دېدی، او.
شریفه زرمتی وردکنینگ اَیتیشیچه، مذاکرهلر ملّي جریان بۉلیب، جریانگه ضرر یېتکزیلمسلیگی کېرهک؛ شونینگ اوچون مذاکره آلیب بارووچی هیأت صبر-طاقت و قاطعیت بیلن آلدینگه اینتیلماقده.
زرمتی وردک خانم افغانستان اسلام جمهوریتی مذاکره آلیب بارووچی هیأتینینگ وطنداشلرنینگ اساسی حقوقلری و ملّي منفعتلرینی حمایه قیلیشده صادقلیگینی تأکیدلر اېکن، هیأت طرفیدن آتش کېسیم کون ترتیبینینگ باشیده قۉییلیشینی اَیتدی.
اونینگ قۉشیمچه قیلیشیچه، میکانیزملرنی یرهتیش و مذاکره جریانینی باییتیش اوچون مذاکره آلیب بارووچی هیأتیگه جامعه تورلی قتلملرینینگ مصلحتلری و فکرلری کېرهک.
شوندن سۉنگ اشتراکچیلر مذاکرهلر هیأتیگه اۉزلرینینگ قرهشلری، تکلیفلری، تشویشلری و سۉراقلری بیلن اۉرتاقلشدیلر. اولرنینگ سۉزلریگه کۉره، خلق مذاکره آلیب بارووچی هیأتدن اۉز حقوقلری و قدریتلرینی حمایه قیلیشلرینی کوتیشماقده.
اشتراکچیلر، مذاکرهلر هیأتیدن تینچلیک مذاکرهلری اوچون اهالی فکرلری و تکلیفلرینی کۉریب چیقیشنی سۉرهدیلر. شونینگدېک، اولر مذاکرهلرنینگ ایکّینچی باسقیچیده آتش کېسیم اعلان قیلیش بۉییچه مذاکره آلیب بارووچی هیأتنینگ موقفینی تأکیدلدیلر.
شونینکدېک، اولر مذاکرهلر جریانیده، مذاکره آلیب بارووچی هیأتگه مشوره بېریش اوچون، متخصصلر و مصلحتچیلردن بیر گروه تشکیل اېتیلیشینی ایستهدیلر.
یوتوقلرنی سقلب قالیش، مذاکرهلر هیأتیگه مصلحت بېریش اوچون اکادمیک کمیتهلر تشکیل اېتیش، یخشی باشقروو و حکومتدارلیککه اعتبار بېریش، واسطهچیلیک گروهینی شکللنتیریش، مذاکرهلر شکلیگه اۉزگریش کېلتیریش و اوروش قربانلری حقوقلرینی اعتبارگه آلیش کبی مسألهلر هم اشتراکچیلرنینگ طلبلری جملهسیدن اېدی.
مذاکرهلر هیأتینینگ با شقه بیر عضوی، خالد نور مذاکرهلر آلیب باریلهیاتگن جایده، شونینگدېک، ملّي یرهشوو عالی کېنگشی قرارگاهیده مذاکرهلر آلیب بارووچی هیأت بیلن مصلحتلشیش اوچون متخصصلر گروهیگه اېگه بولیش ضرورلیگینی اَیتدی.
جناب نور، هیأت آتش کېسیمگه اېریشیشگه حرکت قیلهیاتگنینی بیلدیرر اېکن، ییغیلیش قتنشچیلریدن تینچلیک مذاکرهلری، خصوصاً آتش کېسیم تۉغریسیدهگی کوتیشلرینی واقعی روشده افاده اېتیشلرینی التماس اېتدی.
جناب نورنینگ اَیتیشیچه، مذاکره آلیب بارووچی هیأت مستقل بۉلیب، تیزیمنی، جامعهنینگ برچه قتلملری نامیدن حمایه قیلگن.
شریفه زرمتی وردک مذاکرهلر گروهیدهگی عیاللرنینگ رۉلی حقیده گپیریب، عیاللرنینگ مذاکرهلر هیأتیده فعال اشتراک اېتیشی افغان عیاللرینی طالبلر و خلق ارا همجمعیتگه تنیشتیریشگه آلیب کېلگنینی اَیتدی.
مذاکرهلر هیأتی اعضالرینینگ موافقلیگی و بیرلیگینی تأکیدلگن محمد ناطقی، مذاکرهلر هیأتی موجود تیزیمنینگ یگانه موقفیدن بحثگه کیریشینی تأکیدلدی.
اوچرهشوونی یکونلر اېکن، انسان حقوقلری و مدني همجمعیت تشکیلاتلری بۉییچه تینچلیک ایشلری دولت وزیرینینگ اۉرین باسری داکتر عالمه، اشتراکچیلردن مذاکرهلر هیأتیگه تقدیم اېتیلیشی اوچون اۉزلرینینگ رېجهلرینی وزیرلیک بیلن اۉرتاقلشیشلرینی سۉرهدی.
