مملکت اساسي قانونی قبول قیلینگنینینگ ۱۷ ییللیگی نشانلندی
اساسي قانون قبول قیلینیشینینگ17ییللیگی، افغانستان تینچلیک ایشلری بۉییچه دولت وزیرینینگ موافقلشتیریش، سیاست و استراتیژی بۉییچه اۉرین باسری و حاضر اونینگ وظیفهسینی بجرووچی عبدالله خنجانی، قۉللب-قُوَّتلش و مالی ایشلر بۉییچه وزیر اۉرین باسری غلام یحیی عباسی، وزیرلیکنینگ کتّه مصلحتچیلری و رئیسلری و خادملری همده اساسي قانون بجریلیشینی نظارت قیلیش بۉییچه مستقل کمیسیون وکیلی محمد فاروق فاخر قتنشوویده، تینچلیک بۉییچه دولت وزیرلیگی-نینگ سالونیده نشانلندی.
ییغیلیش باشیده، تینچلیک ایشلری وزیرلیگینینگ تینچلیک تدقیقاتلری بۉییچه باشلیغی گل آغا احمدی، اساسي قانون تاریخچهسی و اساسلری توغریسیده معروضه قیلدی و اساسي قانون برچه افغانستانلیکلر اوچون ملی حجت اېکنلیگینی و اونی هر بیر افغانستانلیک اۉزینینگ شخصي و رسمي ایشلریده عملگه آشیریشی شرطلیگینی تأکیدلدی.
سۉنگره تینچلیک اوچون دولت وزیرلیگینینگ جماعتچیلیکنی خبردار قیلیش بۉییچه رئیسی ضیا دانش، «اساسي قانون، پلورالیزم و برقرار تینچلیک» عنوانی آستیدهگی معروضهسینی تقدیم اېترکن، پلورالیزم و خیلمه-خیللیکنی قبول قیلیش اساسي قانوننینگ مهم خصوصیتلریدن اېکنلیگینی و بو برقرار تینچلیکنی تأمینلش و ملّي حاکمیتنی مستحکملشده مهم رۉل اۉینشینی اَیتدی. او اساسي قانوندهگی دینِ، قومي، مدني و سیاسي پلورالیزمنی عکس اۉتتیرووچی مادهلرگه اشاره قیلدی. جناب دانش شونینگدۉک، اساسي قانوننی افغانستان خلقینینگ سۉنگگی ییگرمه ییلدهگی اېنگ مهم یوتوقلریدن بیری دیب اتهدی و اوشبو قانون ملّي و جهانی قدریتلرنی اۉز ایچیگه آلگنلیگینی اَیتدی.
اساسي قانون بجریلیشینی نظارت قیلیش بۉییچه مستقل کمیسیون وکیلی محمد فاروق فاخرنینگ اَیتیشیچه، ملّي بیرلیک، حاکمیتنی تینچ یۉل بیلن تاپشیریش، سۉز اېرکینلیگی و عاموي اخبار واسطهلرینی یرهتیش اساسي قانون قدریتلری قطاریگه کیرهدی.
اونینگ سۉزلریگه کۉره، تینچلیک ایشلری بۉییچه دولت وزیرلیگی، تینچلیک جریانیده اساسي قانون قدریتلرینی حمایه قیلیش و مذاکرهلر دوامیده اونی سقلب قالیش اوچون اۉز ذمهسیگه جدّی مسؤولیت آلهدی.
ییغیلیش یکونیده تینچلیک وزیری وظیفهسینی بجرووچی و موافقلشتیریش، سیاست و استراتیژی بۉییچه وزیر اۉرین باسری عبدالله خنجانی اساسي قانون برچه وطنداشلرنینگ حقوقلری و اېرکینلرینی حمایه قیلهدی و شونینگ اوچون وطنداشلرنینگ منفعتلری و اېرکینلیکلری ضمانتی صفتیده حمایه قیلینیشی کیرهکلیگینی اَیتدی.
جناب خنجانی اساسي قانوننینگ اهمیتی، دوام اېتهیاتگن سیاسی اۉزگریشلرگه اونی ماسلشتیریشده کوچهیگنینی و بو وطنداشلرنینگ حقوقلری و اېرکینلیکلرینی اۉزیده عکس اېتتیرگن اساسي قانون اېکنلیگینی تأکیدلدی.
او اساسي قانون قدریتلرینی سقلشنی مملکتنینگ برچه وطنداشلری، اینقسه، یاش اولادنینگ مسؤولیتی دېب اتهدی و قانون اۉز-اۉزیدن روحسیز بۉلیب، اونگه روح بغیشلهیدیگن نرسه، وطنداشلر تامانیدن عملگه آشیریلیشی و سقلنیشی اېکنلیگینی تأکیدلدی.
اوشبو ییغیلیش اساسي قانوننی اولوغلش هفتهسی مناسبتی بیلن، اساسي قانون قبول قیلینگنلیگینینگ 17ییللیگینی نشانلش و بو حقده تینچلیک وزیرلیگی خادملری خبردارلیگینی آشیریش مقصدیده اۉتکزیلدی.
