مذاکرهلر هیأتی اعضالری و مملکت عیاللرینینگ تورلی قتلم وکیللری اۉرتهسیده مصلحتلشوو اوچرهشووی بۉلیب اۉتدی
افغانستان اسلام جمهوریتی مذاکرهلر هیأتینینگ رئیسی و عیال اعضالری، ملّي یرهشوو عالی کېنگشی، جمهور رئیسلیک، ملّي خوفسیزلیک کېنگشی، تینچلیک ایشلری بۉییچه دولت وزیرلیگی، ملّی مجلس، وزیرلر شوراسی کبی دولت تشکیلاتلری ترکیبیده بۉلگن بیر قطار عیاللر، مملکت خاتین-قیزلرینینگ تورلی قتلم وکیللری بیلن اوچرهشدیلر.
اوچرهشوو باشیده تینچلیک بۉییچه دولت وزیرینینگ انسان حقوقلری و مدني همجمعیت تشکیلاتلری ایشلری بۉییچه اۉرین باسری داکتر عالمه اشتراکچیلرگه خوش کېلدینگیز دېب، اوچرهشوو حقیده معلومات بېردی .
کیین افغانستان اسلام جمهوریتی مذاکرهلر هیأتی رئیسی محمد معصوم ستانکزی دوحه ده بۉلیب اۉتگن تینچلیک مذاکرهلرینینگ بیرینچی دوری حقیده صحبت قیلدی و مذاکرهلر هیأتینینگ عیال اعضالری مذاکرهلرنینگ برچه قسملریده قتنشگنلیگینی و هیچقندهی مناظرهسی عیاللرنینگ اشتراکیسیز اۉتمهگنلیگینی اَیتدی.
تینچلیک جریانیدهگی عیاللرنینگ اشتراکی و رۉلی مهملیگینی تأکیدلهگن جناب ستانکزی، عیاللرنینگ بیردملیگی بو جریانگه کوچلی تأثیر کۉرستیشی و افغانستانده تینچلیک اورنتیشیگه حصّه قۉشیشی ممکنلیگینی اَیتدی.
سۉنگره ییغیلیش قتنشچیلری مذاکره هیأتی رئیسی و اعضالری بیلن اۉزلرینینگ فکرلری و سؤاللرینی اۉرتاقلشدیلر.
سۉراقلرگه جواب بېرر اېکن، مذاکرهلر هیأتی عضوی دکتور حبیبه سرابی کون ترتیبیدهگی مسألهلر مهملیگینی، اما ایکّی تامان هیأتلری حالی اساسي کون ترتیبیگه کیرمگنلیگینی اَیتدی.
مذاکرهلر هیأتینینگ ینه بیر عضوی شریفه زرمتی وردک اوچرهشوو اشتراکچیلرینینگ سۉراقلریگه جواب بېریب، هیأت اعضالری اۉرتهسیدهگی بیردملیک و کېلیشوو افغانستان اسلام جمهوریتی مذاکرهلر هیأتینینگ ایزچیل حرکتلنیشیگه سبب بۉلگنلیگینی اَیتدی. او تینچلیک جریانی موفقیتی اوچون استوار توریشلری و کورهشیشلرینی تأکیدلدی. او عیاللرنی مذاکرهلر هیأتینینگ آوازینی قیشلاقلرگه یېتکزیشگه چقیردی.
ملّي یرهشوو عالی کېنگشی رئیسینینگ اۉرین باسری زهره مطهر احمدزی، ملّي یرهشوو عالی کېنگشیده عملگه آشیریلگن ایشلرگه توختلر اېکن، کېنگش تینچلیک یۉلیدهگی برچه سعی-حرکتلرنی بیرلشتیریشگه و ایشنی آخریگه یېتکزیشگه قرار قیلگنینی اَیتدی.
تینچلیک بۉییچه دولت وزیرینینگ انسان حقوقلری و مدني همجمعیت تشکیلاتلری بۉییچه اۉرین باسری داکتر عالمه اوچرهشوونی یکونلر اېکن، وزیرلیک مذاکره هیأتینی یېترلی درجهده تکنیکی جهتدن قۉللب-قُوَّتلشینی، شونینگدېک، جمعیتنینگ تورلی قتلملری بیلن مذاکرهلر هیأتی اۉرتهسیده کۉپریک صفتیده مصلحت مجلسلرینی دوام اېتتیریشینی سۉزلهدی.
