شرق منطقهسی طلبهلرینینگ تینچلیک مناظرهسی اوچرهشووی بۉلیب اۉتدی
طلبهلر اۉرتهسیده تینچلیک بحثی اوچرهشوولرینینگ بیرینچی دوری ننگرهار بیلیم یورتی سالونیده بۉلیب اۉتدی. اوچرهشووده محلّی ادارهلرنینگ ولایتلر ایشلرینی موافقلشتیرووچی ریاستی وکیلی، قندهار والیسی اۉرین باسرری، شرق منطقهسی دینی عالملر کېنگشی رئیسی و اعضالری، تینچلیک ایشلری بۉییچه دولت وزیرلیگینینگ شرق منطقهسی رئیسی، شرق منطقهسی بیلیم یورتلری رئیسلری و اۉرین باسرلری، اداری اصلاحات و ملکی خدمتلر کمیسیونینینگ محلدهگی رئیسی، خاتین-قیزلر حقوقلرینینگ فعاللری، مدنی همجمیعیت وکیللری، ننگرهار بیلیم یورتی و معارف استادلری و شرق منطقهسی عاموی اخبار واسطهلری خادملری قتنشگن اېدیلر.
تینچلیک بۉییچه دولت وزیرلیگی تامانیدن تشکیل اېتیلگن بو اوچرهشووده مملکتنینگ شرقی قسمیدهگی تۉرتته دولت بیلیم یورتیدن 40 نفر طلبهلر اشتراک اېتیب، تینچلیک حقیده اۉز فکرلری بیلن اۉرتاقلشدیلر.
دستور باشیده ننگرهار بیلیم یورتی رئیسی، پوهاند خلیل احمد بهسودوال سۉزگه چیقیب، «تینچلیک بحثی» طلبهلرنینگ آنگینی آشیرهدی و طلبهلر تینچلیک حقیده بحث آلیب باریشده اۉز تکلیفلرینی بیلدیریشلری ممکن، دېدی
پوهاند بهسودوالنینگ قۉشیمچه قیلیشیچه، تینچلیک بحثی اېرکک و قیز طلبهلر اوچون تینچلیک جریانیده اشتراک اېتیش امکانیتینی یرهتدی.
ننگرهار والیسینینگ اۉرین باسری حبیبه کاکړ اوشبو دستورنی تشکیل قیلگنی اوچون دولت تینچلیک وزیرلیگیگه منتدارلیک بیلدیرر اېکن، «خلق اوروشدن چرچهگن و تینچلیککه چنقاق»، دېدی.
جامعهدهگی تینچلیکنینگ اهمیتیگه اشاره قیلیب، کاکړ خانیم، افغانستانلیکلر برچه وطنداشلرنینگ حقوقلرینی حرمت قیلهدیگن تینچلیکنی ایستشلرینی قۉشیمچه قیلدی.
تینچلیک بۉییچه دولت وزیرلیگینینگ پایتخت منطقهسی باشلیغی و «تینچلیک بحثی» دستوری اوچون مسؤول بۉلگن باسط حافظی اوشبو دستور اکادمیک مرکزلرده تنلنگن طلبهلر اۉرتهسیده عملگه آشیریلهیاتگنیدن خرسندلیگینی بیلدیردی.
جناب حافظی تینچلیک اوچون کۉرهش فقط حکومتنینگ مسؤولیتی بۉلیب قالمهی، بلکه جمعیت تینچلیگی و فراوانلیگی اوچون تینچلیک یۉلیده خلق حرکتی یۉلگه قۉییلیشی کېرهکلیگینی تأکیدلهدی.
اونینگ سۉزلریگه کۉره، تینچلیک ایشلری بۉییچه دولت وزیرلیگی، تینچلیک جریانیده جمعیتنینگ برچه قتلملری اشتراک اېتیشینی ایستهیدی، شونده اهالینینگ مصلحتلری و تکلیفلری حکومتنینگ تینچلیک فعالیتینی عمومی حالگه کېلتیرهدی و مذاکرهلر میزیده اوشبو فکرلردن فایدهلنیلهدی.
جناب حافظی، طلبهلرارا تینچلیک بحثی اۉتکزیشدن مقصد، بیلیم یورتی طلبهلری اۉرتهسیده فکر المشتیریش و اولرنینگ تینچلیک جریانیده فایدهلنیش مقصدی بیلن فکرلرینی تۉپلش اوچون امکانیت یرهتیش و مذاکرهلر هیأتیگه تقدیم اېتیش اېکنلیگینی اَیتدی.
اونینگ سۉزلریگه کۉره، اوشبو بحثده، 5000 ته تۉغریدن-تۉغری و 50000 ته بالواسطه شکلده فایدهلنووچی موجود بۉلګن.
سۉنگره طلبهلر نطق سۉزلهدیلر و هیأت اعضالری، جملهدن، مدنی همجمعیت وکیلی، ملکی اصلاحاتلر بۉییچه کمیسیون وکیلی، ننگرهار ولایتی وکیلی، تېگیشلی بیلیم یورتی رئیسی و تینچلیک بۉییچه دولت وزیرلیگی وکیلی، هر بیریگه بها بېردی. نتیجه ده، هر بیر بیلیم یورتیدن ایکیتهدن طلبه تنلب آلیندی.
اوشبو بحثنی اۉتکزیش اوچون طلبهلر اۉزلرینینگ ولایت بیلیم یورتلری بیلن اشتراک اېتیش اوچون عرضهلرینی اۉرتاقلشدی و اۉن کیشیلیک ولایت درجهسیدهگی قۉشمه تنلاو کمیسیونی تامانیدن معروضهده قتنشیش اوچون تنلب آلیندی.
اَیتیب اۉتیش کېرهک که سکیز منطقهدهگی تینچلیک بحثی کېتمه-کېت اوچرهشوولری یکونلنگچ، یقین کېلهجکده کابلدهُ مملکتدهگی برچه دولت بیلیم یورتلری طلبهلری اشتراکیده، طلبهلرملّی تینچلیک بحثی بۉلیب اۉتهدی.
