تینچلیک جریانی باسقیچلریده یاشلرنینگ قتنشووی اوشبو جریان‌نینگ قانونیلیگی و برقرارلیگینی آشیره‌دی
بیرلشگن ملتلر تشکیلاتی (ب م ت. مُدللشتیریش، کابل- 2020) نینگ آچیلیشیده آنلاین روشده سۉزگه چیققن تینچلیک ایشلری دولت وزیری‌نینگ انسان حقوقلری و مدني همجمعیت تشکیلاتلری بۉییچه اۉرین باسری داکتر عالمه، یاشلرنینگ تینچلیک جریانی‌نینگ برچه باسقیچلریده اشتراک اېتیشی مهم اېکنلیگینی و جریان‌نینگ قانونیلیگی و برقرارلیگینی آرتتیریشینی تأکیدلدی.
داکتر عالمه افغانستان حکومتی‌نینگ اساساً یاشلرگه تیه‌نگنلیگینی اَیتیب، نزاعلرنی حل قیلیش، تینچلیک اۉرنه‌تیش و اجتماعی تینچلیک میکانیزملرینی ایشگه سالیشده یاشلرنینگ مهم رۉلی، تینچلیک جریانی و برقرار رواجلنیش‌نینگ اساسی ترکیبی قسمی اېکنلیگینی تأکیدلدی.
تینچلیک ایشلری دولت وزیری‌نینگ انسان حقوقلری و مدني همجمعیت تشکیلاتلری بۉییچه اۉرین باسری، نزاعلر و اوروشلردن یاشلر کۉپراق اذیت چېکه‌یاتگنینی اَیتیب، وزیرلیک یاشلرنی تینچلیک جریانی‌نینگ اوچَله باسقیچی – تینچلیکنی اۉرنه‌تیش، تینچلیکنی سقلش و تینچلیکنی برپا اېتیش باسقیچلری‌نینگ همه‌سیگه جلب قیلیشینی تأکیدلدی.
شونینگدېک او، افغانستان اهالیسی‌نینگ کتّه قسمی یاشلر اېکنلیگینی تأکیدلب، یاشلر قربانلرنی دوالشده، تینچلیک ملاقاتی دستورلرینی باشلشده و تینچلیک جریانینی قۉللب-قُوَّتلش اوچون میتینگلر اۉتکزیشده فعال رۉل اۉینشی ممکنلیگینی اَیتدی.
داکتر عالمه‌نینگ قۉشیمچه قیلشیچه، تینچلیک مسأله‌لریده دولت وزیرلیگی‌نینگ وظیفه‌سی و مسؤولیتی فقط تینچلیک مذاکره‌لری دوری بیلن چیکلنیب قالمه‌ی، بلکه تینچلیک شرطنامه‌سینی عملگه آشیریشده و تینچلیک اساسینی مستحکملشده اوزاق وقت دوامیده ینه-ده کتّه اهمیت کسب اېته‌دی.
