تینچلیک بۉییچه دولت وزیری ختای‌نینگ افغانستان بۉییچه مخصوص وکیلی و اونگه همراه هیأت بیلن اوچره‌شدی
تینچلیک ایشلری بۉییچه دولت وزیری و افغانستان اسلام جمهوریتی مذاکره‌لر هیأتی عضوی سید سعادت منصور نادری ختای (چین)نینگ افغانستان بۉییچه مخصوص وکیلی لیو جیان و کابل‌ده‌گی اېلچیسی وان یو بیلن اوچره‌شدی.
تینچلیک ایشلری بۉییچه دولت وزیری، افغانستان و ختای دولتلری اۉرته‌سیده‌گی یخشی مناسبتلرنی تأکیدلب، افغانستان تینچلیک مذاکره‌لری موفقیتگه اېریشیشی اوچون ختای‌نینگ رۉلینی مهم دېب بیلیشینی اَیتدی.
افغانستان اسلام جمهوریتی، تینچلیک مذاکره‌لرینی ایلگری سوریشده قرارلی اېکنینی بیلدیرگن حالده، او قطرده بۉلیب اۉتگن افغانستان تینچلیک مذاکره‌لری‌نینگ بیرینچی باسقیچیده مذاکره‌لرنینگ آلیب باریش اصولی بۉییچه کېلیشووگه اېریشیلگنینی و ایکّینچی باسقیچده مذاکره‌لر کون ترتیبی بحثگه آلینیشینی اَیتدی.
جناب نادری «بیر کمربند، بیرته یۉل» ییریک لایحه‌سیگه تۉخته‌لیب، مملکتلرنینگ سیاسی برقرارلیگی، منطقه‌ده اقتصادی رواجلنیش دستورلرینی عملگه آشیریش اوچون مهم مسأله اېکنلیگینی قۉشیمچه قیلدی. شونگه کۉره، برقرارلیکنی مستحکملش اوچون موجود امکانیتلردن کتّه فایده‌لنیش کیره‌کلیگینی اورغوله‌دی.
تینچلیک بۉییچه دولت وزیری افغانستانده آتش کېسیم اۉرنه‌تیلیشینی خلق‌نینگ اساسی طلبی دېب تعریفله‌دی و تینچلیک اوچون منطقوي و جهاني کېلیشوونی مستحکملش اوچون قۉشنیلرنینگ، خصوصاً افغانستان خلقی اۉز دوستی و برادری دېب بیله‌دیگن ختای‌نینگ رۉلی مهملیگینی اَیتدی.
افغانستان بۉییچه ختای‌نینگ مخصوص وکیلی، افغانستان‌نینگ برقرارلیگی ختای اوچون علیحده اهمیتگه اېگه اېکنلیگینی و افغانستانده‌گی ملّي یره‌شوو اونینگ مملکتی تامانیدن قۉللب-قُوَّتلنه‌یاتگنینی اَیتدی.
افغانستانده تینچلیک اۉرنه‌تیش بۉییچه منطقوي و خلق ارا کېلیشوو مهملیگینی تأکیدله‌گن جناب لیو جیان، ختای بو بارده اۉز رۉلینی اۉینه‌یاتگنینی و «بیر کمربند، بیرته یۉل» پروژه‌سی دایره‌سیده افغانستان بیلن رواجلنیش بۉییچه همکارلیگینی دوام اېتتیرییشینی سۉزله‌دی.
