افغانستان اسلام جمهوریتی مذاکرهلر هیأتینینگ قندهار خلقی بیلن مصلحتلشوو اوچروهشووی
بوگون تینچلیک اوچون دولت وزیرلیگی تامانیدن ملي یرهشوو عالي کېنگشی اۉرین باسری و مذاکرهلر هیأتینینگ بېش اعضاسی قنتشوویده تۉغریدن تۉغری آنلاین علاقه آرقهلی جماعتچیلیک اشتراکینی و فکر المشیشینی تأمینلشگه قرهتیلگن مصلحت اوچرهشووی بۉلیب اۉتدی.
اوشبو آنلاین اوچرهشووده ملی یرهشوو عالي کېنگشی رئیسینینگ اۉرین باسری مولوی عطاءالرحمان سلیم، تینچلیک ایشلری بۉییچه دولت وزیری و تینچلیک مذاکرهلر هیأتی اعضاسی سید سعادت منصور نادری، ینه مذاکرهلر هیأتی اعضالریدن بۉلگن مولوی عطاءالله لودین، فاطمه گیلانی، رسول طالب و شریفه زرمتی وردک اشتراک اېتگن اېدیلر.
تینچلیک اوچون دولت وزیرینینگ قوملر همجهتلیگی و تشکیلاتلر بۉییچه اۉرین باسری عبدالخالق بالاکرزی و قندهار والیسی حیات الله حیات اوشبو ییغیلیشگه میزبانلیک قیلگن اېدیلر.
مصلحتلشوو ییغیلیشلری اۉتکزیلیشینینگ مقصدی بارهسیده عبدالخالق بالاکرزینینگ اَیتیشیگه کۉره، تینتچلیک ایشلری بۉییچه دولت وزیرلیگی، مذاکرهلر هیأتی و تینچلیک جریانینینگ باشقه مسؤوللری بیلن خلق اورتهسیده تۉغریدن تۉغری علاقه باغلنیشی اوچون تورلی یۉللر و امکانلرنی تأمینلشگه حرکت قیلهدی.
ییغیلیش باشیده قندهار والیسی حیات الله حیات نطق سۉزلب، قندهار خلقی تینچلیک مذاکرهلری جریانینی قۉللب قوتلهیدی و اونینگ آلغه باریشی اوچون هیچ قندهی حمایتینی ایهمهیدی، دېدی.
ملی یرهشوو عالی کېنگشی رئیسینینگ اۉرین باسری عطاءالرحمان سلیم، بیز هر ایکّی تامان اوچون موجود امکانیتدن ماکسیمال درجهده فایدهلنیشیمیز کېرهک بۉلگن باسقیچده اېکنلیگیمیزنی و هر ایکّی تامان هم مذاکره اۉتکزیشده ایکّیلنمسلیکلری کېرهکلیگینی اَیتدی.
قندهار ولایتیدن اشتراک اېتگن قوم آقساللری، ولایتی کېنگش وکیللری، دیني عالملر، انسان حقوقلری وعیاللر حقوقلری فعاللری، تینچلیک اوچون کورهشچیلر، اکادمیک شخصیتلر، یاشلر وکیللری و اوروش قربانلری وارثلری مذاکرهلر هیأتی اعضالری بیلن اۉزلرینی قیزیقتیرگن سۉراقلر و خواطرلرنی اۉرتاقلشدیلر.
اوروشنینگ ایلدیزلری، تینچلیک اوچون خلقنینگ ارادهسی، اوروش قربانلری حقوقلری، دوام اېتهیاگن زۉرهوانلیک و آتش کېسیم ضروریتی، تینچلیک مذاکرهلرینینگ کون ترتیبی، خلقنینگ اساسي طلبلری، خاتین-قیزلر حقوقلرینی حمایه قیلیش، مذاکرهلر نتیجهسیدن خلقنینگ کوتیشلری، مذاکره هیأتینی قۉللب- قوَّتلش قندهار اهالیسی بیلن اۉتکزیلگن صحبتنینگ مهم نکتهلریدن اېدی.
مذاکره آلیب بارووچی هیأت اعضالری تینچلیک خلققه تېگیشلی اېکنلیگی و اونگه خلق اۉزی اېگهلیک قیلیشینی تأکیدلب، مذاکرهلرآلیب بارووچی هیأتنینگ خلق بیلن مصلحتلهشیب، تورلی قتلملرنینگ تشویشلریدن خبردار بۉلیشی علیحده اهمیتگه اېگه بۉلگنی و خلقنینگ حقیقي اشتراکیسیز دایمی تینچلیککه اېریشیش ممکن بۉلمگنلیگنیی اَیتدی.
اولر مذاکرهلرنینگ کون ترتیبی بارهسیدهگی کېلیشوونی افغانستان تینچلیک مذاکره لریده آلغه سیلجیش اوچون مهم آدیم دېب اتشدی و افغانستان خلقینینگ اسلامی، ملی و جماعوي منفعتلری هردایم افغانستان اسلام جمهوریتی مذاکرهلر هیأتی عمللرینینگ سرلوحهسیده بۉلیشینی تأکیدلدیلر.
مذاکره هیأتی اعضالری، مذاکره جریانینی دوام اېتتیریشده خلقنینگ قۉللب-قوتلشیگه تۉلیق احتیاج بارلیگینی تأکیدلدیلر، چونکه اولرنینگ کوچلیلیگی و چیدملیلیگی افغانستان خلقینینگ اۉز مملکتیگه بۉلگن اینتیلیشلری و آرزولریدن کېلیب چیقهدی.
اولرنینگ سۉزلریگه کۉره، مذاکرهلر یۉلی قنچه اوزون بۉلیشیگه قرهمهی، هیأت خلق نامیدن و اولرنینگ طلب-ایستکلریگه کۉره ایش آلیب بارهدی و قیینچیلرنی صبر-طاقت بیلن یېچیشگه حرکت قیلهدی.
ییغیلیش سۉنگگیده تینچلیک ایشلری بۉییچه دولت وزیری و مذاکرهلر هیأتینینگ اعضاسی سید سعادت منصور نادری ییغیلیشنی یکونلب اَیتیشیچه، تینچلیک وزیرلیگی مذاکرهلر آلیب بارووچی و تینچلیک ایلغار توزیلمهلری بیلن خلق اۉرتهسیده علاقهلرنی تۉغریدن تۉغری تأمینلنیشیگه زمینه یرهتووچی کۉپریک صفتیده خلقنینگ تورلی قتلملری بیلن مذاکرهلر هیأتیدهگی وکیللرنی بیر-بیرلریگه باغلهیدی. اونینگ قۉشیمچه قیلیشیچه، وزیرلیک مذاکرهلر جریانیده اشتراک اېتیش تمایلینی تأمینلش و تینچلیک جریانینی عاموِي حالگه کېلتیریشگه صادقدیر.
اېسلهتیب اۉتیش ضرورکه، پایتخت کابل و ولایتلر مقیاسیده اهالینینگ تورلی قتلملری اشتراکی بیلن قطار مصلحتلشوو ییغیلیشلری، دوحهده افغانستان تینچلیک مذاکرهلری باشلنیشیدن آلدین یۉلگه قۉییلیگن بۉلیب، دوام اېتیب کېلماقده.
