یو شمېر مشرانو او مخورو د سولې د اووه مادهییزې طرحې ملاتړ وکړ
د کابل، لغمان، جوزجان، مزار شریف، پکتیا او او خوست یو شمېر مشرانو، مخورو، علماوو او ځوانانو د سولې په چارو کې د دولت وزارت له ستر سلاکار میرویس څرګند سره په یوه ناسته کې د سولې د اووه مادهییزې طرحې ملاتړ وکړ.
د لغمان ولایت یوه قومي مشر محمد اکبر په اسلام کې د سولې پر اهمیت او مقام خبرې وکړې. ده وویل چې د پیغمبر صلی الله علیه وسلم ژوند، قرآني لارښوونو او احادیثو ته په کتو سره وینو چې اسلام تل د سولې او پخلاینې طرفدار دی. ده همدارنګه د سولې په پروسه کې د خلکو پر رول ټینګار وکړ او ویې ویل چې افغانان د سولې په پروسه کې ارزښتناک رول لوبولای شي.
د احمدزيو قوم استازي حاجي شاهپسند احمدزي هم د سولې په پروسه کې همکارۍ ته د چمتووالي په ښودلو سره وویل چې خلک د سولې د راوستو لپاره هر ډول سرښندنې ته چمتو دي. ده د سولې په چارو کې د دولت له وزارته وغوښتل چې په دې ملي پروسه کې د خلکو بسیجولو ته کار وکړي او د هېواد په هر ګوټ کې د جګړې د ختمېدو لپاره عملي هڅې وشي. همدارنګه ښاغلي احمدزي له وسلهوالو مخالفانو وغوښتل چې د سولې له پروسې سره یو ځای شي تر څو پایلې ته ورسېږي.
د کوچیانو قومي مشر حاجي اولګل کوچي هم د سولې د اووه مادهييزې طرحې ملاتړ وکړ او پر اوربند یې ټینګار وکړ.
د سولې په چارو کې د دولت وزارت ستر سلاکار میرویس څرګند د بېلابېلو قومونو له استازو او مشرانو څخه مننه وکړه او په دغه بهیر کې یې د دوی رول اغېزناک او مهم وباله. ده د سولې د اووه مادهييزې طرحې په اړه د خبرو تر څنګ وویل چې د اوربند اعلان د سولې د اووه مادهييزې طرحې یو مورد دی او حکومت هڅه کوي چې له ګاونډیانو سره په تفاهم درې میاشتنی اوربند وشي.
ده له مشرانو او مخورو وغوښتل چې د سولې لپاره خپلو هڅو ته دوام ورکړي او ټولو خلکو ته د سولې پیغام ورسوي. ده همدارنګه وویل چې مخالفانو ته هم باید دا پیغام ورسول شي چې هغوی هم راشي او په دغه بهیر کې برخه واخلي.
همدارنګه ده یادونه وکړه چې سوله د خلکو پروسه ده او که خلک پکې ونډه او ګډون ولري، ښې پایلې به ولري.
