ښځې د ملي پخلاینې په راوستلو کې بنسټیز رول لري
د افغانستان اسلامي جمهوریت د مذاکرهکوونکي ټیم غړو حبیبې سرابي او شریفې زرمتۍ وردګ د «ښځو مرکزي ډلې» له غړو سره وکتل.
د ناستې په پیل کې د مذاکرهکوونکي ټيم غړې حبیبې سرابي د سولې بهیر د پرمختګونو اود مذاکرهکوونکي ټیم د کړو فعالیتونو په اړه د ناستې ګډونوالو ته معلومات ورکړل او ویې ویل هڅه دا ده چې د ټولنې له ټولو پاړکو سره د سولې په اړه مشوره وشي.
دې د سولې په بهیر کې د ښځو پر رول په ټینګار سره وویل چې ښځې کولی شي د سولې د مذاکراتو په بهیر کې د خلکو د ترلاسهکېدونکې غوښتنې په توګه د مذاکره کوونکي ټیم همکارې وي.
د ښځو د مرکزي ډلې غړو د افغان دولت په مشرۍ د سولې له بهیره ملاتړ څرګند کړ او زیاته یې کړه چې اړتیا ده له مذاکرهکوونکي ټیم سره د بېلابېلو پاړکو په ځانګړې توګه ښځو ستراتیژیکه اړیکه موجوده وي.
هغوی همدا راز وویل چې د سولې په برخه کې به د روزنې او پوهاوي ورکولو په برخه کې له ښځو سره کار وکړي.
دغو ښځو د سولې په مذاکراتو کې د خپلو حقونو د ساتنې غوښتنه وکړه او ویې ویل څوکلنې لاستهراوړنې نباید د سولې بهیر قرباني شي.
له بلې خوا د مذاکرهکوونکي ټیم غړې شریفې زرمتۍ وردګ د ښځو د مرکزي ډلې د غړو له ملاتړه په مننې وویل چې مذاکرهکوونکی ټیم هڅه کوي د افغانستان د خلکو د ارزښتونو ساتنه وکړي.
مېرمن زرمتۍ په ناسته کې له ګډونوالو ښځو وغوښتل چې منسجمې شي او په واحد غږ سره د خپلو حقونو د دفاع لپاره عدالت غوښتنه وکړي.
د ښځو مرکزي ډله د کابل، کندهار، هلمند، نیمروز، بغلان، پکتیا، دایکندي، کاپیسا، لوگر، پروان، تخار او بدخشان ولایتونو د ښځو له استازو جوړه شوې ده.
