ښځینه عالمانې د سولې په بهیر کې د فعالې ونډې لپاره د ښځو د انسجام په برخه کې کار کوي
د یو شمېر ښځینه مدارسو استادانو او دیني مراکزو مسوؤلینو د سولې په چارو کې د دولت وزارت له ستر سلاکار مولوي عبدالرحمان هوتک سره په لیدنه کې د حکومت په مشرۍ د سولې له بهیر څخه د ملاتړ ترڅنګ زیاته کړه چې د سولې په برخه کې به په هر اړخیز ډول همکاري وکړي.
په دغه لیدنه کې د سولې په چارو کې د دولت وزارت ستر سلاکار د افغانستان د سولې بهیر اړوندو وروستیو پرمختګونو په اړه د مدارسو دغو استادانو او د دیني مرکزونو مسوؤلینو ته معلومات ورکړل او له دغه بهیر څخه د هغوی د هر اړخیز ملاتړ او همکارۍ غوښتنه یې وکړه.
ښاغلي هوتک همدا راز له دغو ښځو وغوښتل چې د افغانستان د ښځو د استازو په توګه خپل نظرونه او وړاندیزونه د سولې په چارو کې د دولت له وزارت سره شریک کړي او د ښځو د حقونو ترلاسه کېدو لپاره خپل غږ پورته کړي.
له بلې خوا د مدارسو استادانو او د دیني مرکزونو مسوؤلینو زیاته کړه چې د ښځینه عالمانو د انسجام لپاره هڅې کوي او له بېلابېلو لارو به د افغانستان د سولې بهیر په اړه د ښځینه عالمانو دریځ اعلان کړي.
