په بیجېنګ کې د افغانانو تر منځ د سولې خبرو ته چمتووالي د بشپړېدو په حال کې دي
د جمهور رئیس ځانګړي استازي او د سولې په چارو کې د دولت وزیر عبدالسلام رحیمي په کابل کې د چین جمهوریت له شارژدافیر وانګ داکشو سره نن تر غرمې وړاندې د جمهوري ریاست په ارګ کې په خپل کاري دفتر کې وکتل.
په دې لیدنه کې په کابل کې د چین جمهوریت شارژدافیر په بیجېنګ کې د سولې د خبرو لپاره د نیول شوو چمتووالو په اړه معلومات وړاندې کړل.
ده وویل هڅه کوو د بیجېنګ ناسته د افغانستان د سولې په بهیر کې مرسته وکړي او د دغه هېواد دولت د چمتووالو د برابرولو په برخه کې اړین اقدامات وکړي.
د جمهور رئیس ځانګړي استازي او د سولې په چارو کې د دولت وزیر عبدالسلام رحیمي په ښه توګه د بیجېنګ ناستې د جوړېدو په موخه د چمتووالو د نیولو او ښو پایلو د ترلاسه کولو لپاره مننه وکړه.
همدارنګه ده د دې ناستې د چمتووالي د بهیر پر چټکتیا ټینګار وکړ.
د یادونې وړ ده چې په بیجېنګ کې د افغانانو ترمنځ د سولې خبرې په راتلونکو څو ورځو کې کېږي.
