منبرونه او جوماتونه د سولې د غږ پورته کولو ځایونه دي
د سولې په چارو کې د دولت وزارت ستر سلاکار ډاکتر میرویس څرګند له یو شمېر علماوو، مخورو، د جوماتونو له امامانو، د افغانستان د نوي څپرکي ټولنې د څانګې له رهبرۍ غړو او د لوګر ولایت د سهاک قوم د شورا له رئیس سره لیدنه او خبرې وکړې.
په دې لیدنه کې ښاغلي څرګند د سولې په چارو کې د دولت وزارت د پالیسۍ او پروګرامونو په اړه خبرې وکړې.
دغو مشرانو د وزارت د پروګرامونو په ملاتړ سره څرګنده کړه چې تر دې ناستې وروسته به د سولې په چارو کې د دولت له وزارت سره په هېواد کې د سولې د ټینګښت په برخه کې خپلو دوامدارو همکاریو ته دوام ورکړي.
د جومات خطیب مولوي حبیبالرسول د اسلام د سپېڅلي دین له لیده د سولې د ټینګښت اړتیا تشرېح کړه او ویې ویل چې سوله په دیني متنونو کې د یوه مهم بحث په توګه مطرح ده او اړتیا ده چې د هېواد په منبرونو او جوماتونو کې د پوهاوي لپاره په دې برخه کې غږ پورته شي.
د افغانستان د نوي څپرکي ټولنې د دویمې څانګې رئیسې فاطمې حسیني د سولې په بهیر کې د ښځو پر رول خبرې وکړې او ویې ویل چې دغه ټولنه به د سولې په چارو کې د دولت له وزارت سره د سولې په ټينګښت او پالیسیو عملي کولو کې په هر اړخیز ډول همکاره وي.
