مطبوعاتي خبرپاڼه
د افغانستان اسلامي جمهوري دولت د سولې په لار کې له موجودو ټولو فرصتونو استفاده کوي تر څو ولس او هېواد د جګړې له دې اوږدې غمیزې وژغوري. له همدې امله دولت د هېواد د ملي ګټو په چوکاټ کې د امریکا متحدو ایالتونو او طالبانو ترمنځ د مذاکراتو له پروسې سره همکاري کړې او په منظمه توگه یې د دې لړۍ د ټولو اجراآتو او انکشافاتو پر وخت معلومات اخیستي.
اوسمهال چې تر بل هر وخت د تاوتریخوالي د کمېدو، د جنگ د درېدو او سولې خوا ته د عملي گامونو د اوچتېدو هیله پیاوړې شوې موږ په پروسه کې فعال حضور او له خپلې خوا د هر لازم اقدام پوره چمتووالی لرو او هیله لرو چې مقابل لوری هم د خپلو تعهداتو د پوره کولو پوره اراده او توان وښیي.
هره شېبه د تاوتریخوالي د کمېدو د پیل وخت ته نږدې کېږو. د ټول ولس دا دعا ده چې لوی خدای (ج) دې د سولې سپېڅلي هدف ته د رسېدو توفیق را په برخه کړي.
د سولې په چارو کې د دولت وزارت
