مشورتي ناستې د سولې په بهیر کې د خلکو ونډه زیاتوي
د پروان ولایت د مدني ټولنې یو شمېر فعالانو د سولې په چارو کې د دولت وزارت د سیاسي جوړښتونو او مدني ټولنې د بنسټونو د انسجام له رئیسې لیلا جعفري سره په لیدنه کې د سولې بهیر او د دولت او طالبانو ترمنځ د مذاکراتو په اړه خپل نظرونه او لیدلوري شریک کړل.
د ناستې په پیل کې مېرمن جعفري د سولې په چارو کې د دولت وزارت او د سیاسي جوړښتونو او مدني ټولنې د بنسټونو ریاست د فعالیتونو په اړه معلومات ورکړل او ویې ویل چې د سولې په چارو کې د دولت وزارت د مشورتي ناستو په جوړولو سره د سولې په بهیر کې د خلکو د ونډې ډېرولو په هڅه کې دی.
نوموړې همدا راز د سولې په چارو کې د دولت وزارت او مدني ټولنې د بنسټونو ترمنځ د دوامداره ارتباط غځېدا ته په اشارې سره وویل د مدني ټولنې بنسټونو د ارتباطي پل په توګه مهم مسؤولیت لري او کولی شي وزارت ته د خلکو د نظرونو او لیدلورو په لېږد کې همکاري وکړي.
د مدني ټولنې دغو فعالانو په اسلام کې د سولې او پخلاینې پر ځای او په ټولنه کې یې په لوړه اړتیا په ټینګار سره وویل چې باید د افغانانو ترمنځ سوله او پخلاینه وشي او له ناراضه ډلو سره سوله وشي.
هغوی په هېواد دننه د ملي اجماع او د باور فضا پر جوړولو ټینګار وکړ او زیاته یې کړه چې د ملي اجماع او باور فضا جوړولو لپاره باید کار وشي.
دغو فعالانو همدا راز د جګړې د لاملونو ريښې موندلو او راسپړلو ته په اشارې سره وویل چې اړتیا ده د جګړې عوامل مطالعه او او وپېژندل شي او وروسته د همدغو عواملو په رڼا کې د سولې لپاره هڅې وشي.
د ناستې پر دوام د سولې په چارو کې د دولت وزارت د سیاسي جوړښتونو او مدني ټولنې د بنسټونو رئیسې په ناسته کې د مدني ټولنې د استازو له ګډون څخه مننه وکړه او د هغوی له خوا مطرح شوو پوښتنو ته یې ځوابونه وویل.
مېرمن جعفري زیاته کړه چې حکومت د تلپاتې، باعزته او عدالتمحوره سولې په هڅه کې دی؛ خو د دغې موخې ترلاسه کولو لپاره اړتیا ده چې ټول خلک په ځانګړې توګه د مدني ټولنې بنسټونه خپل مسؤولیت ادا کړي.
د سولې په چارو کې د دولت وزارت د سیاسي جوړښتونو او مدني ټولنې د بنسټونو رئیسې همدا راز وویل چې د سولې لپاره ملي اجماع شته ده او سیمهییزه اجماع هم جوړه شوې ده. دې د ګاونډیو هېوادونو ملاتړ د سولې لپاره د سیمهییزې همپالنې د جوړېدو ښه بېلګه یاده کړه.
