مذاکرهکوونکی ټیم به د افغانانو له واحد دریځ استازیتوب وکړي
«د سوېل ختیځ زون عالي کمیسیون» د رهبرۍ شورا غړو د مذاکرهکوونکي ټیم له غړو، فوزیې کوفي، شریفې زرمتۍ وردګ، ایوب انصاري او حبیبې سرابي سره په لیدنه کې د خپلو لیدلورو او غوښتنو په مطرح کولو سره له هغوی وغوښتل چې د سولې په مذاکراتو کې خپلې هڅې د هېواد پر ملي ګټو متمرکزې کړي.
د سوېل ختیځ زون عالي کمیسیون د رهبرۍ شورا غړو د سولې په بهیر کې د قومي مشرانو رول مهم وباله او له مذاکرهکوونکي ټیم یې وغوښتل چې د سولې بهیر د لا ډېر مؤثریت لپاره د قومي مشرانو په ځانګړې توګه هغو کسانو چې په قومي جرګو او د شخړو په حل کې تجربه لري یوه درېیمګړې منځنګړې ډله جوړه کړي.
د ناستې ګډونوالو د خلکو د غوښتنې په توګه د اوربند اعلان او د سولې بهیر پر ښهوالي ټینګار وکړ او ویې ویل اړینه ده چې د دولت او ملت ترمنځ د باور فضا پیاوړې شي.
د سولې اړوندو جوړښتونو ترمنځ د همغږۍ رامنځته کول، د سولې په ادبیاتو کار کول، له بېلابېلو پاړکو سره سلا مشورې، د سولې په بهیر کې د ټولو قومونو ښکېلول او د ملي او نړیوالې اجماع جوړولو لپاره کار هغه موارد وو چې له مذاکرهکوونکي ټیم سره شریک شول.
د مذاکرهکوونکي ټیم غړې فوزیې کوفي «د سوېل ختیځ زون عالي کمیسیون» د رهبرۍ شورا له غړو په مننې وویل، مذاکرهکوونکی ټیم به د افغانانو له واحد دریځ استازیتوب وکړي او دا یې غوره وبلله چې د مذاکراتو په منځپانګه چې د خلکو ګډ دریځ او غوښتنې دي تمرکز وشي. دې په دې ټکي په ټینګار سره چې مذاکرهکوونکی ټیم به د افغانستان د خلکو له ارزښتونو دفاع کوي وویل چې اړتیا ده د افغانستان اسلامي جمهوریت او خلکو د منل شوو ارزښتونو د دفاع لپاره سره یو شو.
له بلې خوا د مذاکره کوونکي ټیم بلې غړې شریفې زرمتۍ وردګ وویل چې دغه ټیم له بېلابېلو پاړکو سره ګڼې ناستې کړې او له دغو نظرونو د سولې مذاکراتو د مېکانېزم په بډاینه کې کار اخیستل کېږي.
د مذاکرهکوونکي ټیم بل غړي جنرال ایوب انصاري هم د مذاکرهکوونکي ټيم د کاري ډول په اړه د معلوماتو په ورکړې سره وویل چې دغه ټیم به په مذاکراتو کې لازمې چانې وهي او وروستۍ پرېکړه به د افغانستان خلک کوي.
د مذاکرهکوونکي ټیم بلې غړې حبیبې سرابي وویل ټیم به هڅه کوي چې هرڅه ژر اوربند پلی شي.
نوموړې همدا راز وویل د مذاکراتو په لړ کې به د بحث وړ مواردو لپاره د اړتیا په صورت کې خلکو ته مراجعه کوي.
مذاکرهکوونکي ټیم له جوړېدو وروسته د ټولنې له بېلابېلو پاړکو چې ښځې، ځوانان، علما، مشران او قومي مخور، د مدني ټولنې بنسټونه او د ټولنې نور پاړکي شاملېږي لیدنې کړې دي.
