له یو شمېر ښځینه فعالانو سره د جمهور رئیس د ځانګړي استازي او د سولې په چارو کې د دولت د وزیر لیدنه
یو شمېر ښځینه فعالانو نن له غرمې وروسته د جمهور رئیس له ځانګړي استازي او د سولې په چارو کې د دولت له وزیر عبدالسلام رحیمي سره وکتل او د سولې د پروسې او له طالبانو سره د خبرو اترو په اړه یې خپلې اندېښنې او وړاندیزونه شریک کړل.
هغوی د جګړې اصلي قربانیان ښځې وبللې او د سولې په اوسنیو پیل شوو خبرو کې یې د هغوی د حقونو او لاستهراوړنې په ساتلو ټینګار وکړ.
دغو ښځو چې د بېلابېلو اقشارو استازولي یې کوله څرګنده کړه چې د سولې له پروسې به ملاتړ کوي او د سولې په چارو کې د دولت له وزیر یې وغوښتل چې له طالبانو سره د مذاکره کوونکي پلاوي په ترکیب کې ښځو ته پام وشي ترڅو د افغان مېرمنو رښتینی غږ ورسوي.
د جمهور رئیس ځانګړي استازي او د سولې په چارو کې د دولت وزیر عبدالسلام رحیمي د سولې په شان ملي پروسو کې د ښځو د با اهمیته رول په اړه د ټینګار تر څنګ وویل چې ښځې خپله د خپلو حقونو د خونديتوب لپاره پیاوړې جبهه ده او اوس کولای شي د سولې په پروسه کې ارزښتناک رول ولري.
نوموړي زیاته کړه چې د ښځو ونډه به له پامه نه غورځول کېږي او د ښځو واحد غږ ته به درناوی کېږي.
