له ښځو سره د تاوتریخوالي د منعې قانون او د ښځو او ماشومانو د ځورولو د منعې قانون په اړه د پوهاوي دوهورځنی ورکشاپ پرانیستل شو
له ښځو سره د تاوتریخوالي د منعې قانون او د ښځو او ماشومانو د ځورولو د منعې قانون په اړه د پوهاوي دوهورځنی ورکشاپ پرانسیتل شو چې د سولې په چارو کې د دولت وزارت د بشري حقونو او مدني ټولنې د چارو مرستیالې ډاکتر عالمې او د دغه وزارت کارکوونکو ګډون پکې کړی و.
د سولې په چارو کې د دولت وزارت د بشري حقونو او مدني ټولنې د چارو مرستیالې ډاکتر عالمې د ناستې په پیل کې د افغانستان د ښځو غورځنګونو ته اشاره وکړه او ویې ویل، که څه هم د ښځو مبارزې له پخوا راهیسې روانې دي خو لا هم له ښځو سره په بېلابېلو ډولونو تاوتریخوالی کېږي.
ډاکتر عالمې وویل چې د دغه دوهورځني ورکشاپ د جوړېدو موخه له ښځو سره د تاوتریخوالي د منعې قانون او د ښځو او ماشومانو د ځورولو د منعې قانون پوهاوی دی او ټینګار یې وکړ چې ټول باید پر قانون خبر وي او په عملي کولو کې یې همکاري وکړي.
همدا راز ډاکتر عالمې په سیاسي او ټولنیزو فعالیتونو کې د ښځو مهم رول ته اشاره وکړه، د سولې په بهیر کې یې د ښځو حضور مهم او برخهلیک ټاکونکی وباله او هیله یې وښوده چې ښځې په دغه بهیر کې لا ډېره ونډه واخیستلی شي.
ورپسې د ښځو چارو وزارت روزونکو صلاحالدین فیضي او شکریې یاسیني د تاوتریخوالي، د تاوتریخوالي د ډولونو او له ښځو سره د تاوتریخوالي د منعې قانون د بنسټونو په اړه معلومات وړاندې کړل. د غونډې ګډونوالو د نظرونو او پوښتنو په مطرح کولو سره په بحث کې برخه واخیسته.
