عبدالسلام رحیمي: حکومت د سولې له مذاکراتو وړاندې د تاوتریخوالي درېدو هڅو ته دوام ورکوي
د جمهور رئیس ځانګړي استازي او د سولې په چارو کې د دولت وزیر عبدالسلام رحیمي د افغانستان لپاره د ملګرو ملتونو له ځانګړي استازي تدامیچي یاماماتو او ورسره پلاوي سره په لیدنه کې وویل: حکومت د سولې له مذاکراتو وړاندې د تاوتریخوالي درېدو هڅو ته دوام ورکوي.
په دغه لیدنه کې د سولې په چارو کې د دولت وزیر د افغانستان د سولې په بهیر کې د یوناما له همکاریو د مننې ترڅنګ د افغانستان د سولې بهیر په پرمختګ کې د دغه بنسټ پر اغېزناک رول ټینګار وکړ.
نوموړي د سولې بهیر د پرمختګونو په اړه د معلوماتو په ورکړې سره د سولې په بهیر کې د یوناما د ملاتړ د دوام غوښتونکی شو.
عبدالسلام رحیمي زیاته کړه د افغانستان خلک د تاوتریخوالي په درېدو ټینګار کوي او حکومت د مذاکراتو له پیل وړاندې د خلکو د دغې غوښتنې د عملي کېدو لپاره هڅې کوي.
په دغه لیدنه کې ښاغلي یاماماتو د افغانستان د سولې له بهیر څخه د یوناما د ملاتړ ډاډ ورکړ او د سولې په چارو کې د دولت له وزارت سره یې د دغه بنسټ د لا ډېرو مرستو اعلان وکړ.
د افغانستان لپاره د ملګرو ملتونو ځانګړي استازي اېران ته د خپل وروستي سفر یادونه وکړه او د افغانستان د سولې بهیر په اسانولو کې یې د پاکستان رول مهم وباله، نوموړي د سولې په بهیر کې پر سیمهییزه اجماع او د دغو هېوادونو پر رول ټينګار وکړ.
