د کاپیسا ولایت د تګاب ولسوالۍ یو شمېر قومي مشرانو د سولې د بهیر ملاتړ اعلان کړ

د کاپیسا ولایت د تګاب ولسوالۍ یو شمېر قومي مشرانو د سولې په چارو کې د دولت وزارت د ولسي چارو له ستر سلاکار ډاکتر میرویس څرګند سره په لیدنه کې د سولې د بهیر ملاتړ اعلان کړ.
د کاپیسا یوه قومي مشر آغاشیرین صافي وویل چې د جګړې په کلونو کې د جګړې اصلي زیان خلکو ته اړولی او همدا خلک دي چې د سولې لپاره کار هم کولای شي.
ده ټینګار وکړ چې که دوی ته د همکارۍ لپاره زمینه برابره شي، د سولې په بهیر کې به د همکارۍ لپاره له هېڅ ډول قربانۍ څخه په شا نه‌شي.
ښاغلي صافي هیله وښوده چې د سولې په چارو کې د دولت وزارت به د سولې لپاره د خلکو د خبرو او مشورو اخیستلو لپاره زمینه برابره کړای شي.
حاجي انځورګل صافي هم د افغانانو پر یووالي ټینګار وکړ او ویې ویل چې په هر ډول شرایطو کې د سولې په چارو کې د دولت له وزارت سره همکارۍ ته چمتو یو.
د سولې په چارو کې د دولت وزارت د ولسي چارو ستر سلاکار ډاکتر میرویس څرګند له دغو قومي مشرانو مننه وکړه او ویې ویل: د ویاړ ځای دی چې د هېواد له ګوټ ګوټه خلک د سولې وزارت ته راځي او د سولې په بهیر کې د همکارۍ غوښتنه کوي.
ده ټینګار وکړ چې د سولې په چارو کې د دولت وزارت د فعالیت بنسټ د خلکو نظرونه دي او ویې ویل چې د سولې بهیر به د سولې په چارو کې د دولت وزارت په مدیریت او د خلکو په نظرونو سره پر مخ یوړل شي.
همدارنګه ښاغلي څرګند یوځل بیا د سولې لپاره کار د هر افغان ایماني او انساني مسوولیت وباله او د دغه مسوولیت پر ادا کولو یې ټینګار وکړ.