د ولسي جرګې له رئیس سره د سولې په چارو کې د دولت وزارت د همغږۍ ناسته
د سولې په چارو کې د دولت وزارت سرپرست او د قومونو او بنسټونو چارو مرستیال عبدالخالق بالاکرزي او د دغه وزارت د ملي شورا د همغږۍ رئیس جمال ناصر اصولي د ولسي جرګې له رئیس میررحمان رحماني سره وکتل.
په دې لیدنه کې چې د سولې په چارو کې د دولت وزارت له ملي شورا سره د همغږۍ ریاست لهخوا تنظیم شوې وه، د سولې بهیر د پرمختګونو په برخه کې د معلوماتو شریکولو لپاره د همغږۍ پر رامنځته کولو بحث وشو.
عبدالخالق بالاکرزي په دې لیدنه کې د سولې په چارو کې د دولت وزارت د کارکړنو په اړه خبرې وکړې او ویې ویل، لکه څرنګه چې دغه وزارت د خلکو له بېلابېلو پاړکو سره د سولې په برخه کې مشوره کوي، د سولې مذاکراتو په اړه د معلوماتو په شریکولو کې د خلکو استازو ته هم ژمن دی.
بل پلو د ولسي جرګې رئیس ښاغلي رحماني د افغانستان د سولې مذاکراتو په اړه اطلاعرسونه مهمه وبلله او ویې ویل، اړتیا ده چې د سولې د هڅو او پرمختګونو په برخه کې معلومات د ملي شورا له غړو سره شریک شي او د دوامدارې همغږۍ یو میکانیزم جوړ شي.
په دې ناسته کې پرېکړه وشوه چې د افغانستان د سولې د مذاکراتو پرمختګ دې د سولي په چارو کې د دولت وزارت له لوري په منظم او دوامدار ډول له ملي شورا سره شریک شي.
