د مدني ټولنې د نوو راټوکېدلو رهبرانو له شبکې سره د مذاکرهکوونکي ټیم د غړو مشورتي ناسته
له بېلابېلو پاړکو سره د مذاکرهکوونکي ټیم د مشورتي ناستو پر دوام فوزیې کوفي او خالد نور د ټیم په استازیتوب د «مدني ټولنې د نوو راټوکېدلو رهبرانو شبکې» له مشر او غړو سره وکتل.
د مذاکرهکوونکي ټیم غړې فوزیې کوفي وویل چې دغه ناسته د یادې شبکې د غړو د نظرونو او وړاندیزونو ترلاسه کولو په موخه جوړه شوې ده.
نوموړې د سولې بهیر په اړه وویل چې د دغه بهیر وخت نیوونکي او پېچلي حالت ته په پام سره دا اړتیا رامنځته کېږي چې د مذاکره کوونکي ټیم او مدني ټولنې د بنسټونو ترمنځ نږدې اړیکې او د همکارۍ فضا موجوده وي. مېرمن کوفي همدا راز زیاته کړه چې دغه ټیم په یو شمېر طرحو کار کړی چې د نوو نظرونو له ترلاسه کولو وروسته به وروستۍ او د تصویب لپاره به د مصالحې عالي شورا او حکومت ته واستول شي.
د مذاکرهکوونکي ټيم بل غړي خالد نور د دغه ټیم د فعالیتونو په اړه د معلوماتو په ورکړې سره زیاته کړه چې دوی په تېرو درېیو میاشتو کې د ټولنې له بېلابېلو پاړکو سره پرله پسې مشورتي ناستې کړې دي. نوموړي همدا راز وویل په هغو ګڼو ناستو کې چې د ټیم د غړو ترمنځ شوې د مذاکراتو پر منځپانګه او د ټیم په داخلي چارو بحث شوی دی. ده له دغې شبکې وغوښتل چې د سولې بهیر په اړه خپل نظرونه، وړاندیزونه او غوښتنې له دوی سره شریک کړي.
د مدني ټولنې د نوو راټوکېدلو رهبرانو د شبکې مشر ناظم مظهر د دغې شبکې د فعالیتونو د څرنګوالي په اړه د معلوماتو په ورکړې سره له مذاکرهکوونکي ټیم سره د همکارۍ لپاره چمتووالی وښود او ډاډ یې ورکړ چې د دغې شبکې غړي په خپلخوښي ډول له مذاکرهکوونکي ټیم سره همکارۍ ته چمتو دي.
د ناستې پر دوام د دغې شبکې نورو غړو د سولې بهیر په اړه خپل وړاندیزونه، نظرونه، اندېښنې او غوښتنې له مذاکره کوونکي ټیم سره شریک کړل.
د دغې شبکې غړو د سولې په بهیر کې د ځوانانو او مېرمنو پر پوره او معنادار حضور ټینګار وکړ او ویې ویل اړتیا ده چې د ښځو، ځوانانو، قومي او مذهبي لږکیو په حضور یو مشوره ورکوونکی مذاکراتي ټیم جوړ شي او د اړتیا پر مهال د مشورې په برخه کې له مذاکره کوونکي ټیم سره همکاري وکړي.
د مدني ټولنې د دغه بنسټ غړو همدا راز د سولې بهیر پر ټول شمولوالي د ټینګار ترڅنګ وړاندیز وکړ چې مذاکرهکوونکی ټیم دې د افغانستان له ګوټ ګوټ څخه د خلکو خبرې واوري او د مشورې غوښتلو لمنه دې یوازې تر کابل ولایته نه محدودوي.
د اوربند ټینګښت بل هغه مورد و چې د دغه بنسټ غړو پرې ټینګار کاوه.
د مذاکرهکوونکي ټیم غړو د نظرونو او وړاندیزنو له اورېدو وروسته د هغوی پوښتنو او اندېښنو ته ځواب ووایه او ډاډ یې ورکړ چې د مذاکراتو په لړ کې به د ټیم هر یو غړی د هېواد له ملي ګټو دفاع وکړي.
د یادولو وړ ده چې له دې وړاندې هم مذاکره کوونکي ټیم د نظرونو او وړاندیزونو ترلاسه کولو لپاره د مدني ټولنې له ګڼو بنسټونو سره مشورتي ناستې جوړې کړې دي.
