د شمال زون مدني ټولنې بنسټونو له استازو سره د سولې په چارو کې د دولت وزارت مشورتي ناسته
د بلخ، سمنګان او سرپل ولایتونو د مدني ټولنې بنسټونو یو شمېر مسؤولانو د سولې بهیر په اړه خپل نظرونه او وړاندیزونه د وېډیو کنفرانس له لارې د سولې په چارو کې د دولت وزارت د سیاسي جوړښتونو او مدني ټولنې د بنسټونو له رئیسې لیلا جعفري سره شریک کړل.
د شمال زون مدني ټولنې د بنسټونو مسؤولانو د سولې بهیر پر ټولشمولوالي ټینګار وکړ او د سولې په چارو کې د دولت له وزارته یې وغوښتل چې د ټولنې ټول پاړکي په دغه بهیر کې ونډه ولري.
دغو مدني فعالانو وویل چې د سولې مذاکراتو موضوعات دې د مدني ټولنې له بنسټونو سره هم شریک شي ترڅو د مدني ټولنې استازي ځان د سولې په بهیر کې ښکېل وبولي.
د سولې په چارو کې د دولت وزارت د سیاسي جوړښتونو او مدني ټولنې د بنسټونو رئیسې لیلا جعفري په مشورتي ناسته کې د مدني ټولنې د بنسټونو د مسؤولانو له حضور څخه په مننې سره وویل چې سوله یو ملي بهیر دی او اړتیا ده چې ټول خلک په دغه بهیر کې ونډه ولري. دې د مدني ټولنې بنسټونه د حکومت او خلکو ترمنځ ارتباطي پل وباله او زیاته یې کړه چې د مدني ټولنې د بنسټونو استازي باید د هېواد له لېرې سیمو د خلکو غږ راټول او د سولې مذاکراتو تر مېز یې ورسوي.
نوموړې د مدني ټولنې د بنسټونو او د سولې په چارو کې د دولت وزارت ترمنځ د همغږۍ په رامنځته کېدو ټینګار وکړ او ويې ویل چې د سولې فضا جوړول او د سولې لپاره کار کول یوازې د وزارت مسؤولیت نه دی؛ بلکې ټول خلک په ځانګړي ډول د مدني ټولنې بنسټونه باید د دغې مهمې برخې لپاره کار وکړي او د حکومت او مدني ټولنې د بنسټونو ترمنځ اړیکه دوه اړخیزه ده.
مېرمن جعفري د شمال زون مدني ټولنې له بنسټونو وغوښتل چې د سولې بهیر په اړه خلکو ته د مشورې او پوهاوي ورکولو په برخه کې د سولې په چارو کې د دولت له وزارت سره همکاري وکړي.
