د سولې په چارو کې د دولت په وزارت کې د قرآنکریم ختم وشو
د وروستیو پېښو د شهیدانو روح ته د دعا او په ملي ماتم کې د غمشریکۍ لپاره د سولې په چارو کې د دولت وزارت د چارواکو، کارکوونکو او علماوو په حضور کې د قرآنکریم د ختم مراسم پرځای شول.
د سولې په چارو کې د دولت وزیر او د افغانستان اسلامي جمهوریت د مذاکرهکوونکي پلاوي غړي سید سعادت منصور نادري د دغو مراسمو په پای کې پر کابل پوهنتون پرونی ترهګریز برید او دې ته ورته وروستۍ پېښې وغندلې او ویې ویل چې اسلام د خلکو تر منځ ځانګړی مقام لري، پرونۍ پېښه او د هغې په څېر نورې پېښې چې د سولې مذاکراتو تر پیل وروسته شوې دي، نه یوازې په اسلام کې نهشته بلکې د انسانیت له دایرې هم بهر دي.
ښاغلي نادري د وروسیتو پېښو د شهیدانو کورنیو ته د ډاډګېرنې تر څنګ وویل: د افغانستان دښمنان د سولې مخالف دي، خو د سولې په چارو کې د دولت وزارت دروازه تل پرانیستې ده او هڅه کوو چې په هېواد کې رښتینې، باعزته او تلپاتې سوله راشي.
همدارنګه ده ټینګار وکړ چې وروستي تاوتریخوالي او پېښې نه یوازې افغانانو ته د منلو نه دي، بلکې ګاونډیو هېوادونو او نړیوالې ټولنې ته هم د زغملو وړ نه دي.
