د سولې په چارو کې د دولت وزیر د چین د خلق جمهوریت له سفیر سره وکتل
د جمهور رئیس ځانګړي استازي او د سولې په چارو کې د دولت وزیر عبدالسلام رحیمي د چین د خلق جمهوریت له سفیر وانګ یو سره وکتل او د سولې د بهیر پر وروستیو بدلونونو یې خبرې وکړې.
ښاغلي رحیمي په دې لیدنه کې وویل چې د تاوتریخوالي کمښت د اندازې وړ نه دی او عملي اړخ نهلري.
د جمهور رئیس ځانګړي استازي او د سولې په چارو کې د دولت وزیر له طالبانو سره د سولې د خبرو پیلولو لپاره د افغانستان د اسلامي جمهوریت دریځ اوربند وباله او ویې ویل چې د افغانستان اسلامي جمهوریت د سولې په بحثونو او خبرو اترو کې ګډون ته چمتو دی.
ده زیاته کړه چې د افغانستان د اسلامي جمهوریت او طالبانو تر منځ د خبرو اترو لپاره د اوربند مخکېشرط د سولې د خبرو د ردولو په معنا نه دی.
د چین سفیر په دې لیدنه کې ټینګار وکړ چې چین د افغانستان د سولې د بهیر ملاتړ کوي.
