د سولې په چارو کې د دولت وزیر د سولې لپاره د همغږۍ او مشورتي مجمع له مسوولانو سره وکتل
د جمهوررئیس ځانګړي استازي او د سولې په چارو کې د دولت وزیر عبدالسلام رحیمي د سولې لپاره د (اهل تشیع او هزاروو) د همغږۍ او مشورتي مجمع له مسوولانو ډاکتر رسول طالب، سیدنادرشاه بحر، زهرا یګانه او سخي رضايي سره وکتل.
په دغه لیدنه کې د یادې مجمع مسوولانو د افغانستان اسلامي جمهوریت مذاکرهکوونکی پلاوی د افغانستان د خلکو لاستهراوړنه وبلله او خپل ملاتړ یې ترې څرګند کړ.
هغوی زیاته کړه چې مجمع د سولې په ټولو پړاوونو کې همکارۍ ته چمتو ده او د سولې په چارو کې د دولت وزارت سره یې د دوامداره اړیکې د جوړولو غوښتنه وکړه.
د سولې په چارو کې د دولت وزیر عبدالسلام رحیمي په دغه لیدنه کې د مجمع د ملاتړ مننه وکړه.
د جمهور رئیس ځانکړي استازي زیاته کړه چې د سولې په چارو کې د دولت وزارت د افغانانو له ارزښتونو څخه د دفاع په برخه کې د مدني ټولنې د بنسټونو رول مهم ګڼي او له هغوی سره به اړیکې لاپراخې کړي.
