د سولې په چارو کې د دولت وزیر: د جګړې د قربانیانو لپاره عدالت د شخړې د تلپاتې ختم لپاره یوه بنسټیزه اړتیا ده
د سولې په چارو کې د دولت وزیر سید سعادت منصور نادري د «قربانیانو په ملي غونډه» کې چې د بشري حقونو د نړیوالې ورځې او د جګړې د قربانیانو د ملي ورځې په مناسبت جوړه شوې وه وویل: د جګړې د قربانیانو لپاره عدالت د شخړې د تلپاتې ختم لپاره یوه بنسټیزه اړتیا ده.
د سولې په چارو کې د دولت وزیر په خپله وینا کې زیاته کړه چې د شخړو د ختمولو نړیوالې تجربې ښيي چې د عدالت له پلیتابه او د جګړې د زیانمنو له مشارکت پرته تلپاتې او عادلانه سولې ته رسېدل ناشوني دي.
ښاغلي نادري وویل چې د افغانستان اسلامي جمهوریت مذاکرهکوونکی پلاوی د نظام او خلکو په استازیتوب د سولې په بهیر کې د جګړې د قربانیانو د حقونو او نظرونو رعایت ته ژمن دی.
دغه راز د سولې په چارو کې د دولت وزیر تلپاتې سولې ته د رسېدو په برخه کې د اوچت شوو ګامونو په اړه خبرې وکړې او د مذاکراتي پلاوي له ټاکلو نیولې، په دوحه کې د مذاکراتو تر پیل او د مذاکراتو لپاره پر طرزالعمل تر هوکړې، په افغانستان کې د جګړې د ناورین د حل لپاره د سیمهییزو او نړیوالو هڅو تر زیاتوالي او په وروستیو ورځو کې د ملي مصالې د عالي شورا د رهبرۍ کمېټې تر جوړېدو یې یادونه وکړه.
سید سعادت منصور نادري د سیاسي اجماع د پیاوړتیا لپاره د ګوندونو د مشرانو او ملي شخصیتونو راټولېدل د ملت لپاره غوره پيغام وباله او زیاته یې کړه چې د ملي ګټو د دفاع، د نظام د لاستهراوړنو د ساتنې او د هېواد د برخلیک په اړه ټول یو دي او په یوه واحد صف کې ولاړ دي.
په دغه ناسته کې د افغانستان د بشري حقونو د خپلواک کمیسیون مشرې شهرزاد اکبر، په افغانستان کې د ملګرو ملتونو ځانګړې استازې دیبورا لیونز، د افغانستان لپاره د اروپايي ټولنې ځانګړي استازي رولانډ کوبیا او د بشري حقونو په چارو کې د دولت وزیرې سیما سمر هم خبرې وکړې.
د یادولو وړ ده چې د قربیانیانو ملي غونډه د قربانیانو د ملي شبکې او د مدني ټولنې د یو شمېر بنسټونو په همکارۍ جوړه شوه، په دغه ناسته کې له ټول هېواد څخه څه باندې ۲۰۰ قربانیانو او د بشري حقونو ۳۰ مدافعانو او د مدني ټولنې، بشري حقونو یو شمېر فعالانو او دیپلوماتیکو استازو ګډون کړی و.
