د سولې په چارو کې د دولت وزیر د افغان ښځو د ملګرو سفیرانو له ډلې سره وکتل
د سولې په چارو کې د دولت وزیر سید سعادت منصور نادري د افغان ښځو د ملګرو سفیرانو له ډلې سره وکتل.
په دې لیدنه کې د سولې مذاکراتو پر وروستیو پرمختګونو، په دغه بهیر کې د ښځو پر مهم رول، د ملي او سیاسي اجماع د پیاوړي کولو پر هڅو او ترکیې ناستې ته پر چمتووالي بحث وشو.
د سولې په چارو کې د دولت وزیر وویل چې د سولې په چارو کې د دولت وزارت د سولې بهیر د تسهیلوونکي په توګه په دغه بهیر کې د ټولنې د ټولو پاړکو شاملولو او ملاتړ ته ژمن دی.
همدا راز ښاغلي نادري د ښځو د وروستیو شل کلنو لاستهراوړنو د ساتنې اهمیت ته اشاره وکړه او ټینګار یې وکړ چې د مذاکراتو دواړه لوري باید د ښځو د شمولیت مسئلې ته پام وکړي.
ګډونوالو هم د مذاکراتو په بهیر کې د ښځو حضور مهم وباله او ویې ویل چې ښځې باید په مذاکراتو او پرېکړو کې ښکېلې وي.
د افغان ښځو د ملګرو سفیرانو په ډله کې د ملګرو ملتونو د بېلابېلو هېوادونو ښځینه چارواکې او استازې شاملې دي. دغه ډله په ټولنه، حکومت او د سولې په هڅو کې د افغان ښځو د حقونو او لاستهراوړنو د ملاتړ لپاره جوړه شوې ده.
