د سولې په چارو کې د دولت وزیر د اسلامي همکاریو سازمان له سفیر سره د مخه ښې لیدنه وکړه
د سولې په چارو کې د دولت وزیر سید سعادت منصور نادري په افغانستان کې د اسلامي همکاریو سازمان (OIC) له سفیر حسین آوني بوستالي سره د مخه ښې لیدنه وکړه.
په دې لیدنه کې د سولې په چارو کې د دولت وزیر، ښاغلی بوستالي د افغانستان خلکو ته یو منلی شخصیت وباله چې د افغانستان، سیمې او نړۍ په اړه یې پوهه د ماموریت په دوره کې د مهمو لاستهراوړنو لامل شوې ده.
سید سعادت منصور نادري د افغانستان په مسایلو په تېره په سوله او اسلامي نړۍ کې د اسلامي همکاریو سازمان پر رول ټینګار وکړ او ویې ویل چې د افغانستان اسلامي جمهوریت او اسلامي همکاریو سازمان تر منځ د اړیکو ټینګښت د ښاغلي بوستالي د ماموریت په دوره کې پام وړ دی.
په دې لیدنه کې د اسلامي همکاریو سازمان سفیر په جده کې د اسلامي نړۍ د علماوو کنفرانس جوړېدو ته اشاره وکړه او ویې ویل، دغه سازمان د افغانستان د سولې بهیر په ملاتړ کې هېڅ ډول هڅه نه ده سپمولې.
همدا راز ده د افغانستان د سولې بهیر په اړه خپل نظرونه څرګند کړل او افغانستان ته یې د تلپاتې او سراسري سولې دعا وکړه.
ښاغلي بوستالي د اسلامي همکاریو سازمان د ځینو مطالعاتو پایلې د سولې په چارو کې د دولت له وزارت سره شریکې کړې.
په پای کې د سولې په چارو کې د دولت وزیر، ښاغلي بوستالي ته په راتلونکي ماموریت کې د بریالیتوب هیله وکړه.
