د سولې په چارو کې د دولت وزیر د اروپايي ټولنې له سفیر سره وکتل
په دغه لیدنه کې د جمهور رئیس ځانګړي استازي او د سولې په چارو کې د دولت وزیر د اروپايي ټولنې له سفیر پیري مایدون او ورسره پلاوي سره د سولې بهیر او د مدني ټولنې د بنسټونو د رول په اړه خبرې وکړې.
په دې لیدنه کې پیري مایدون د سولې په بهیر کې د مدني ټولنې پر رول، له ټولنې سره د معلوماتو پر شریکولو او د سولې له بهیر څخه د خلکو پر ملاتړ خبرې وکړې.
نوموړي همدا راز وویل اروپايي ټولنه د سولې بهیر په تخنیکي چارو کې همکارۍ ته چمتو ده.
د سولې په چارو کې د دولت وزیر د وروستیو دوو لسیزو پرمختګونو په ترلاسه کولو کې د اروپايي ټولنې له رول څخه مننه وکړه.
عبدالسلام رحیمي وویل حکومت توانېدلی د سولې لپاره ملي اجماع جوړه کړي او اوسمهال د سولې د بیې پر سر د اجماع په جوړولو کار روان دی. نوموړي د مدني ټولنې د بنسټونو ارزښتناکو فعالیتونو ته په اشارې سره وویل چې دغه بنسټونه به د سولې بهیر د تمرکز زدایۍ او په دغه بهیر کې د ولایتونو او ولسوالیو د خلکو په مشارکت کې اغېزناک رول ولوبوي.
د جمهور رئیس ځانګړي استازي زیاته کړه، چې حکومت د ټولنې د سترې برخې په توګه د ښځو ظرفیت ته متوجه دی او د سولې په بهیر کې د مشارکت او شمولیت ډاډمنولو لپاره یې د یو مناسب جوړښت په رامنځته کولو کار پیل شوی دی.
نوموړي وویل، چې د سولې په چارو کې د دولت وزات د ولایتونو او ولسوالیو د ولسي ډلو په اوږدمهاله همکاریو ټینګار لري.
