د سولې په چارو کې د دولت وزارت د ښځو ځورونې د منعې کمېټې غړي معرفي شول
په یوه ناسته کې د سولې په چارو کې د دولت وزارت د ښځو ځورونې د منعې کمېټې غړي معرفي شول چې د سولې په چارو کې د دولت وزیر سید سعادت منصور نادري، د بشري حقونو او مدني ټولنې د چارو مرستیالې ډاکتر عالمې، حمایوي او اداري مرستیال غلامیحیی عباسي، د دغه وزارت سترو سلاکارانو، رئیسانو او کارکوونکو ګډون پکې کړی و.
د دغې ناستې په پیل کې د سولې په چارو کې د دولت وزیر سید سعادت منصور نادري له ښځو او ماشومانو سره د تاوتریخوالي د منعې قانون د هېواد یو مهم قانون وباله او ویې ویل چې د دغه قانون رعایت د هر کس وجیبه ده.
ده وویل له ښځو سره د تاوتریخوالي د مخنیوي یوازنۍ لاره دا ده چې د ښځو او ماشومانو د ځورونې د منعې قانون تطبیق شي او زیاته یې کړه، اړتیا ده چې د دغه قانون په اړه د پوهاوي لپاره د سولې په چارو کې د دولت په وزارت کې یو سیمینار جوړ شي.
ښاغلي نادري، وزارت د کارکوونکو په تېره د ښځو لپاره د مناسب او خوندي کاري چاپېریال جوړولو ته ژمن وباله او ویې ویل چې باید دغه مناسبه کاري فضا موجوده وي.
د سولې په چارو کې د دولت وزارت د بشري سرچینو رئیس بسمالله صاعد د ښځو د ځورونې د منعې کمېټې غړي معرفي کړل.
د جنډر پالیسۍ د تطبیق آمرې تورپېکۍ رحیمي د ښځو د ځورونې د منعې کمېټې د موخو او دندو په اړه معلومات ورکړل.
د سولې په چارو کې د دولت وزارت د ښځو د ځورونې د منعې کمېټه د بشري حقونو او مدني ټولنې چارو د مرستیالې ډاکتر عالمې په ریاست، د جنډر د همغږۍ د رئیسې ناهیدې حیدري او د دغه وزارت د بشري سرچینو د رئیس بسمالله صاعد په غړیتوب جوړه شوې ده.
