د سولې په چارو کې د دولت سرپرست وزیر د چک جمهوریت له سفیر سره وکتل

د سولې په چارو کې د دولت وزارت سرپرست او د همغږۍ، پالیسۍ او ستراتيژۍ د چارو مرستیال عبدالله خنجاني په کابل کې د چک جمهوریت له سفیر ښاغلي ایرژي بالون سره وکتل.
په دې لیدنه کې د چک جمهوریت سفیر په وروستیو کلونو کې په بېلابېلو برخو کې د افغانستان له خلکو سره د دغه هېواد پر همکاریو خبرې وکړې او ویې ویل چې چک جمهوریت د باثباته او دیموکراتیک افغانستان ملاتړ کوي.
نوموړي زیاته کړه چې چک جمهوریت د افغانستان د سولې بهیر او مذاکراتو د بریالیتوب هیله لري او خپل دیپلوماتیک ملاتړ ته دوام ورکوي.
د سولې په چارو کې د دولت سرپرست وزیر د ښوونې او بیارغونې په ګډون په بېلابېلو برخو کې د چک جمهوریت د وروستیو دوو لسیزو همکارۍ یادې کړې او مننه یې وکړه.
عبدالله خنجاني وویل، د افغانستان اسلامي جمهوریت مذاکره‌کوونکی پلاوی د مذاکراتو د دویم پړاو لپاره په دوحه کې دی او د افغانستان د دولت او خلکو پوره ملاتړ ورسره دی.
ده زیاته کړه چې روان تاوتریخوالي او هدفي وژنو د افغانستان خلک اندېښمن کړي، له دې امله د افغانستان اسلامي جمهوریت مذاکره‌کوونکي پلاوي جګړه درېدل او اوربند د مذاکراتو لپاره د خپلې اجنډا لومړیتوب ټاکلی.
ښاغلي خنجاني وویل، د مذاکراتو د بهیر په مخته تګ کې د نړیوالې ټولنې ملاتړ ځانګړی اهمیت لري او د افغانستان خلک د نړیوالو شریکانو د ملاتړ دوام غواړي.