د سولې په برخه کې د سیاسي ګوندونو د تماس کمېټې لومړۍ ناسته وشوه
د سیاسي ګوندونو د تماس کمېټې لومړۍ ناسته وشوه چې د سولې په چارو کې د دولت وزارت د بشري حقونو او مدني ټولنې د بنسټونو چارو مرستیالې ډاکتر عالمې ګډون پکې کړی و.
د سولې په چارو کې د دولت وزارت د بشري حقونو او مدني ټولنې د بنسټونو چارو مرستیالې ډاکتر عالمې د ناستې په پیل کې وویل چې د تماس کمېټې په جوړېدو سره سیاسي ګوندونو لوی مسؤولیت ته اوږه ورکړې ده. دې زیاته کړه چې د سولې په چارو کې د دولت وزارت د تماس کمېټې د مسؤولیت اداینې تسهیلوونکی دی.
دې وویل، د کمېټې د جوړېدو او له وزارت سره د کمېټې د ګډو ناستو موخه دا ده چې د ګوندونو نظرونه راټول شي او له مذاکرهکوونکي پلاوي سره شریک شي.
د بشري حقونو او مدني ټولنې د چارو مرستیالې وویل چې دغه کمېټه د سولې په بهیر کې اغېزناک او مهم رول لرلی شي.
په دې ناسته کې د تماس کمېټې غړو د فعالیتونو پیلولو پر ډول او اړوند میکانیزم خبرې وکړې. دوی د ناستو لپاره پر همغږۍ رامنځته کولو، د اداري پلاوي پر ټاکلو او د دندو پر لایحې جوړولو ټينګار وکړ.
د کمېټې د غړو تر رایې اچونې وروسته یو کس د راتلونکې ناستې رئیس او دوه کسه منشیان وټاکل شول.
د سولې په چارو کې د دولت وزارت د بشري حقونو او مدني ټولنې د بنسټونو چارو مرستیالې ډاکتر عالمې ژمنه وکړه چې دغه وزارت د کمېټې ناستو ته اړینې آسانتیاوې برابروي.
په پای کې د سولې په چارو کې د دولت وزارت د سیاسي جوړښتونو او مدني ټولنې د بنسټونو رئیسې لیلا جعفري ناسته راټوله کړه.
