د سولې لپاره د مدني ټولنې د مشورې او همغږۍ د بورډ کاري کړنلاره تصویب شوه
په هغه ناسته کې چې «د سولې لپاره د مدني ټولنې د بنسټونو د مشورې او همغږۍ بورډ» د کاري کړنلارې د وروستي کولو لپاره د سولې په چارو کې د دولت په وزارت کې جوړه شوه، دغه کړنلاره د بورډ د غړو په اکثریتو رأیو سره په پرنسیپ کې تصویب شوه.
په دې ناسته کې لومړی د دې کړنلارې اصلاح شوې نسخه د بورډ له غړو سره شریکه شوه او تر هغه وروسته چې ټول نظرونه او وړاندیزونه واورېدل شول، د بورډ غړو په اکثریتو رأیو تایید کړه.
په دې کړنلاره کې د بورډ موخې، تشکیلاتي جوړښت او د بورډ د عمومي مجمع دندې شاملې دي.
همدارنګه په دې کړنلاره کې د ټولنې له بېلابېلو پاړکو او د سولې بهیر له اړوندو جوړښتونو سره د بورډ د غړو ارتباطي او مشورتي میکانیزم هم په پام کې نیول شوی.
د یادلو ده چې د دغه بورډ غړي په یوه مشورتي ناسته کې ـ چې د مدني ټولنې د اویا بنسټونو په شتون کې د سیاسي جوړښتونو او مدني ټولنې د بنسټونو ریاست جوړه کړې وه ـ دغو بنسټونو له مرکز او اوو زونونو څخه ټاکلي دي. د سولې په چارو کې د دولت وزارت د دغه بورډ چارې تسهیلوي.
