د سولې لپاره د مدني ټولنې د بنسټونو د مشورې او همغږۍ بورډ د مشورې او همغږۍ دوهورځنی ورکشاپ پای ته ورسېد
د سولې لپاره د مدني ټولنې د بنسټونو د مشورې او همغږۍ بورډ د مشورې او همغږۍ ورکشاپ چې د دغه بورډ د پنل د غړو او د زونونو د استازو په ګډون د دوو ورځو لپاره پیل شوی و د بورډ د غړو له خوا د ځانګړو وړاندیزونو او غوښتنو په وړاندې کولو سره پای ته ورسېد.
د ورکشاپ په پای ناسته کې لومړی د سولې په چارو کې د دولت وزارت د سیاسي جوړښتونو او مدني ټولنې د بنسټونو رئيسې لیلا جعفري د ورکشاپ له ګډنوالو د مننې ترڅنګ د ورکشاپ د ګروپي کار د ډول په اړه معلومات وړاندې کړل.
ورپسې ذبېحالله ایثار د ورکشاپ د غړو د دوو ورځو د ګروپي کارونو د مهمو ټکو په بیانولو سره وویل اړتیا ده د سولې لپاره د مدني ټولنې د مېکانېزم د اجرايي کولو پر تدبیري پلان، د زونونو په کچه د فعالیت لپاره د تګلارې په رامنځته کولو، د سولې په چارو کې د دولت وزارت او د سولې لپاره د مدني ټولنې د بنسټونو د مشورې او همغږۍ بورډ ترمنځ د اړیکې پر تعریف، د سولې د ستراتيژيو او پالیسیو په جوړولو کې د مدني ټولنې د مشورې په اخیستلو او د مدني ټولنې له خوا د سولې پر بهیر د څار د زمینې آسانولو په اړه لا ډېر بحثونه وشي او په دې برخه کې عملي کار وشي.
د سولې په چارو کې د دولت وزارت د بشري حقونو او مدني ټولنې د چارو مرستیالې ډاکتر عالمې د سولې په برخه کې د مدني ټولنې د کارکړنو په ستاینې سره وویل چې د سولې په چارو کې د دولت وزارت ژمن دی د سولې لپاره د مدني ټولنې د بنسټونو د مشورې او همغږۍ بورډ د فعالیتونو د تسهیل لپاره لا ډېر کار وکړي.
نوموړې همدا راز وویل چې دغه بورډ به د زونونو په کچه د وزارت دفترونو ته ور وپېژندل شي تر څو د زونونو او ولایتونو په کچه له مذاکرهکوونکي پلاوي سره د خلکو د وصل زمینه زیاته شي.
په دغه ورکشاپ کې چې د دوو ورځو لپاره جوړ شوی و د سولې لپاره د مدني ټولنې د بنسټونو د مشورې او همغږۍ بورډ د پنل د غړو په ګډون د مدني ټولنې پنځلسو فعالانو او د زونونو استازو پکې ګډون کړی و.
