د سولې له روانو هڅو د قومي مشرانو ملاتړ
یو شمېر قومي مشرانو د جمهور رئیس له ځانګړي استازي او د سولې په چارو کې د دولت له وزیر عبدالسلام رحیمي سره په لیدنه کې د سولې په برخه کې د روانو هڅو ملاتړ وکړ.
دغه لیدنه چې نن له غرمې مخکې ترسره شوه، قومي مشرانو ټینګار وکړ چې د سولې د خبرو اترو د پرمختللو او د دغې پروسې د اسانولو لپاره هېڅ ډول هڅې نه درېغوي.
عبدالسلام رحیمي د سولې په برخه کې د قومي مشرانو رول مهم وباله او ویې ویل چې د سولې ټینګښت یوازې د حکومت او یا یوې ادارې کار نه دی او د خلکو ملاتړ او هڅو ته اړتیا لري.
نوموړي ټینګار وکړ چې په دغه پروسه کې د خلکو ښکېلتیا به مثبتې پایلې ولري.
ښاغلي رحیمي زیاته کړه چې د اوربند له ورځو د خلکو درک دا و چې ترمنځ یې ذاتي او شخصي دښمني نشته او دا د دوی ترمنځ په لوی لاس جوړ شوی واټن دی.
ښاغلي رحیمي ټینګار وکړ چې حکومت ولسي ملاتړ ته اړتیا لري او سوله یوازې هغه مهال راتلی شي چې افغانان خپل موضوعات پهخپله حل کړي.
