د سولې د طرحې په اړه د نظرونو د توحید او د مسودې د چمتو کولو جلسه جوړه شوه
د ملي مصالحې عالي شورا د رهبرۍ غړي محمد یونس قانوني په مشرۍ د سولې د طرحې په اړه د نظرونو د توحید او د مسودې د چمتو کولو مؤظفې کمېټې په سپېدار ماڼۍ کې ناسته وکړه چې د ملي مصالحې عالي شورا رئیس ډاکتر عبدالله عبدالله هم پکې ګډون کړی و.
د ناستې په پیل کې د سولې په چارو کې د دولت وزیر سید سعادت منصور نادري د ملي مصالحې عالي شورا د ۳۰ تنو غړو لهخوا د وړاندې شوو نظرونو د راټولونې، توحید او محتوايي تحلیل په اړه خبرې وکړې.
نوموړي وویل چې په دغه پروسه کې د امانتولۍ په رعایتولو سره نظرونه راټول، توحید او کمي او محتوايي تحلیل یې شوی دی.
په دغه ناسته کې د مؤظفې کمېټې غړود لیدلورو د تحلیل مسوده و ارزوله. اوربند او د جګړې پای ته رسول، حقونه او بنسټیز ارزښتونه، په واک کې عادلانه ونډه او اساسي قانون د دغې مسودې له سرلیکونو دي.
د دغې پروسې له پای ته رسېدو او د سمونونو له راوړلو وروسته به مسوده د ملي مصالحې عالي شورا د رهبرۍ کمېټې ته وړاندې شي.
