د سولې بهیر ملاتړي هېوادونه د سولې له جوړښتونو سره مرسته او همکاري کوي
د سولې په چارو کې د دولت وزیر سید سعادت منصور نادري او د ملي مصالحې د عالي شورا ستر سلاکار مصطفی مستور په افغانستان کې د ملګرو ملتونو د مرستندوی ماموریت (یوناما) په کوربهتوب په یوه آنلاین ناسته کې ګډون وکړ چې د یو شمېر هېوادونو سفیرانو او استازو او د سولې بهیر ملاتړو او مرستندویو نړیوالو بنسټونو ګډون پکې کړی و.
په سر کې د سولې په چارو کې د دولت وزیر له یوناما څخه د کوربهتوب او د غونډې له ګډونوالو څخه د سولې د بهیر او جوړښتونو د ملاتړ په خاطر مننه وکړه.
ښاغلي نادري د افغانستان د سولې بهیر د رامنځته شوو جوړښتونو د رول په اړه معلومات وړاندې کړل. ده وویل چې د ملي مصالحې عالي شورا د سولې د بهیر سیاسي بدنه ده، مذاکرهکوونکی پلاوی مذاکرات کوي او د سولې په چارو کې د دولت وزارت د افغانستان د سولې او پخلاینې بهیر د تخنیکي بدنې په توګه کار کوي.
د سولې په چارو کې د دولت وزیر د حسابورکولو او له فساد سره د مبارزې اصل ته په اشارې سره وویل چې د سولې ټول جوړښتونه د روڼتیا ملاتړ کوي.
سید سعادت منصور نادري د خبرو په دوام وویل، د سولې جوړښتونه د پروګرامونو په تطبیق او وړتیا جوړولو کې د نړیوالو شریکانو همکارۍ ته اړتیا لري.
په دې ناسته کې د یوناما مرستیال سټیو بروکېنګ د سولې جوړښتونو د پروګرامونو د ملاتړ لپاره د دغې ادارې چمتووالی اعلان کړ.
همدا راز د ناستې ګډونوالو د همکارۍ د ساحو او څرنګوالي په برخه کې خپل نظرونه څرګند کړل. دوی وویل چې د سولې د بهیر او فعالانو ملاتړ کوي او د سولې جوړښتونو د پروګرامونو په مخته وړلو کې به مرسته وکړي.
د ملي مصالحې د عالي شورا ستر سلاکار مصطفی مستور د دغې شورا د تشکلیلاتو او د فعالیت د څرنګوالي په اړه معلومات وړاندې کړل، ویې ویل چې د سولې په چارو کې د دولت وزارت له دغې شورا سره په پوره همغږۍ خپل رول ادا کوي.
ده د ګډونوالو وړاندې کړي نظرونه مهم وبلل او ویې ویل چې د ملي مصالحې عالي شورا د همکاریو د عملي کولو لپاره لازمې زمینې برابروي.
د سولې په چارو کې د دولت وزارت د همغږۍ، پالیسۍ او ستراتيژۍ د چارو مرستیال عبدالله خنجاني پر روڼتیا او حسابورکولو ټینګارونو ته په اشارې سره وویل چې منظمې همکارۍ مثبتو پایلو ته د رسېدو لامل کېږي.
