د خلکو د لیدلورو په لېږد کې د مدني ټولنې د بنسټونو رول مهم دی
له بېلابېلو پاړکو سره د سولې په چارو کې د دولت وزارت د مشورتي ناستو پر دوام د سیاسي جوړښتونو او مدني ټولنې د بنسټونو ریاست په کابل کې د تخار ځوانانو سازمان، د تلپاتې سولې د علمي او څېړنیزې مؤسسې، د ښځو لپاره د سولې پراختیایي او مشورتي مؤسسې، د سولې ټینګښت شورا او د روڼاندو ځوانانو شورا له غړو سره وکتل.
ګډونوالو په دغه ناسته کې د سولې بهیر پر ټولشمولوالي په ټینګار سره خپل لیدلوري، مشورې او وړاندیزونه شریک کړل او د افغانستان اسلامي جمهوریت په مشرۍ یې د سولې بهیر د ملاتړ په څرګندولو سره خپلې پوښتنې او اندېښنې هم شریکې کړې.
د سیاسي جوړښتونو او مدني ټولنې د بنسټونو د انسجام رئیسې لیلا جعفري د سولې بهیر په اړه د دغو بنسټونو د وړاندیزونو، طرحو او ملاتړ د هرکلي ترڅنګ مدني بنسټونه د خلکو او دولت ترمنځ ارتباطي پل وباله او د مذاکرې تر مېزه یې د خلکو د لیدلورو په رسولو کې د دغو بنسټونو رول ارزښتناک یاد کړ او ډاډ یې ورکړ چې د مدني ټولنې د بنسټونو باور به ساتل کېږي.
دې ډاډ ورکړ چې دولت به د سولې په بهیر کې د خلکو د غږ رسوونکی وي او د جمهور رئیس د صراحت مطابق به د سولې په اړه وروستۍ پرېکړه د افغانستان خلک کوي.
