د جګړې د قربانیانو کمېټې د جوړولو لپاره د همغږۍ ناسته وشوه
د جګړې د قربانیانو کمېټې د جوړولو لپاره د همغږۍ ناسته وشوه چې د سولې په چارو کې د دولت وزارت د بشري حقونو او مدني ټولنې د بنسټونو چارو مرستیالې ډاکتر عالمې او د جګړې د قربانیانو د حقونو په برخه کې د فعالو بنسټونو یو شمېر استازو هم ګډون پکې کړی و.
د ناستې په پیل کې ډاکتر عالمې د جګړې له قربانیانو سره د سولې په چارو کې د دولت وزارت د مخکېنیو ناستو په اړه معلومات وړاندې کړل او ویې ویل چې د جګړې د قربانیانو په غوښتنه د جګړې د قربانیانو د انسجام او د دغه پاړکي د غږ یوځای کولو لپاره یوې کمېټې جوړلو ته اړتیا ده.
دې وویل، د سولې په چارو کې د دولت وزارت غواړي چې د جګړې د قربانیانو د حقونو په برخه کې د فعالو بنسټونو په وړاندیز دغه کمېټه جوړه کړي، تر څو د سولې په بهیر کې د جګړې د قربانیانو واحد غږ رامنځته کړي.
دې د سولې د هوکړو پر مهال او تر هغه وروسته د جګړې د قربانیانو د حقونو پوره کېدو او ساتل کېدو ته د ګډ کار لپاره د دغې کمېټې جوړېدل مهم وبلل او ټینګار یې وکړ چې د سولې په چارو کې د دولت وزارت به د دغې کمېټې د تسهیلاتي چارو په برخه کې همکاري وکړي.
ورپسې د جګړې د قربانیانو د حقونو په برخه کې د فعالو بنسټونو استازو د دغې کمېټې د جوړولو په اړه خپل وړاندیزونه شریک کړل.
د ناستې ګډونوالو د سولې په بهیر کې د جګړې د قربانیانو ښکلېولو او د سولې په مذاکراتو کې د حضور لپاره د دغسې کمېټې جوړېدل مهم وبلل او ټینګار یې وکړ چې دغه کمېټه باید ټولشموله وي او د جګړې د قربانیانو د حقونو په برخه کې د ټولو فعالو بنسټونو د حضور زمینه پکې برابره وي.
همدارنګه دوی وویل چې په دې کمېټه کې باید ځینې متخصصین او د مدني ټولنې فعالین هم موجود وي او د کمېټې په جوړېدو سره تیت پرک فعالیتونه همغږي شي.
د ناستې په پای کې پرېکړه وشوه چې ناسته باید د جګړې د قربانیانو د حقونو په برخه کې د ټولو فعالو بنسټونو په حضور کې وشي او د دغې کمېټې پر جوړېدو لا ډېرې مشورې او بحثونه وشي.
