د ترکیې له سفیر سره د سولې په چارو کې د دولت وزیر لیدنه
د جمهور رئيس ځانګړي استازي او د سولې په چارو کې د دولت وزیر عبدالسلام رحیمي په کابل کې د ترکیې له سفیر اوغوزخان آرطغرل سره ولیدل.
په دغه لیدنه کې چې د افغانستان له سولې څخه د نړیوالې ملاتړې ډلې د جوړېدو لپاره له بهرنیو چارواکو سره د سولې په چارو کې د دولت وزارت د ناستو پر دوام ترسره شوه، د سیمې په وضعیت او د افغانستان د سولې په بهیر یې په اغېزو خبرې وشوې.
د سولې په چارو کې د دولت وزیر په بېلابېلو برخو په ځانګړې توګه د سولې په بهیر کې د ترکیې له دایمي هڅو مننه وکړه.
ښاغلي رحیمي وویل چې د سولې په چارو کې د دولت وزارت به د افغانستان د سولې بهیر د ملاتړې ډلې په جوړولو سره له نړیوالو همکارانو سره یو ځای د افغانستان سولې ته کار وکړي.
