د افغانستان لپاره د ناټو د ملکي استازي له مرستیال سره د سولې په چارو کې د دولت وزیر لیدنه
د سولې په چارو کې د دولت وزیر او د افغانستان اسلامي جمهوریت د مذاکرهکوونکي پلاوي غړي سید سعادت منصور نادري په دوحه کې د افغانستان لپاره د ناټو د ملکي استازي له مرستیال نیکولاس دین سره وکتل.
په دغه لیدنه کې د ناټو سازمان د هر اړخیزو همکاریو، د دغو همکاریو د دوام او د افغانستان د سولې پر بهیر خبرې وشوې.
د سولې په چارو کې د دولت وزیر د افغانستان د سولې په بهیر کې د ناټو پر مهم رول ټینګار وکړ. نوموړي همدا راز وویل چې باعزته او تلپاتې سولې ته د رسېدو لپاره د داخلي او سیمهییزې اجماع پیاوړتیا د دغه وزارت له لومړیتوبونو دي.
