د افغانستان له نړیوالو همکارانو جوړه د سولې د بهیر ملاتړې ډلې رامنځته کېږي
د سولې په برخه کې د نړیوالې اجماع د پیاوړتیا او همدارنګه په دغه بهیر کې د لا ډېرې همغږۍ او انسجام لپاره د جمهور رئیس محمد اشرف غني د حکم له مخې د سولې د بهیر ملاتړې ډله د افغانستان د اسلامي جمهوري حکومت په استازيتوب، د سولې په چارو کې د دولت وزارت په مشرۍ جوړېږي.
په دغه حکم کې راغلي چې د سولې په چارو کې د دولت وزارت، پر مشرۍ سربېره د دې ډلې دارالانشا هم پر غاړه لري.
د سولې په بهیر کې د ښکېلو هېوادونو سفارتونه، د افغانستان د سولې د بهیر مهم تمویلوونکي او همدارنګه اړوندې نړیوالې ادارې د دې ډلې غړي دي.
د دغه حکم له مخې د بهرنیو چارو وزارت او نورې اړوندې دولتي ادارې مؤظفې دي چې د سولې په چارو کې د دولت له وزارت سره اړینې همکارۍ وکړي؛ ټولې دولتي ادارې باید د سولې د بهیر په برخه کې له نړیوالو ادارو او تمویلوونکو سره د اړیکو او همغږۍ لپاره د سولې په چارو کې د دولت له وزارت سره په همغږۍ کار وکړي.
د دغه حکم له مخې باید د سولې په چارو کې د دولت وزارت د دې ډلې د کاري پرمختګ په اړه د افغانستان د اسلامي جمهوریت ریاست ته راپور ورکړي.
