د افغانستان د سولې کور بنسټ له غړو سره د سولې په چارو کې د دولت وزارت د بشري حقونو او مدني ټولنې د مرستیالې لیدنه
د سولې په چارو کې د دولت وزارت د بشري حقونو او مدني ټولنې د چارو مرستیالې ډاکتر عالمې «د افغانستان د سولې کور» بنسټ له غړو سره وکتل.
په دغه لیدنه کې د افغانستان د سولې کور بنسټ غړو د پېژندګلوۍ ترڅنګ د دغه بنسټ د کارکړنو، فعالیتونو او لاستهراوړنو په اړه معلومات وړاندې کړل.
دوی همدا راز د افغانستان د سولې کور او د سولې په چارو کې د دولت وزارت ترمنځ د ګډو همکاریو په اړه هم خبرې وکړې.
ډاکتر عالمې د دغه بنسټ د کاکړنو د ستاینې ترڅنګ ټینګار وکړ چې د سولې په چارو کې د دولت وزارت په ځانګړې توګه د بشري حقونو او مدني ټولنې د چارو معاونیت چې تل له مدني ټولنې سره په نږدې اړیکه کې دی، هڅه کوي تلپاتې سولې ته د رسېدو لپاره د مدني ټولنې د بنسټونو او د سولې په چارو کې د دولت وزارت ترمنځ ګډې همکارۍ پراخې کړي.
