د استرالیا له نوي سفیر سره د سولې په چارو کې د دولت وزیر لیدنه
د جمهور رئیس ځانګړي استازي او د سولې په چارو کې د دولت وزیر د استرالیا له نوي سفیر جیف توت (Geoff Tooth) سره تعارفي لیدنه وکړه.
په دغه لیدنه کې د استرالیا نوي سفیر د افغانستان د سولې له پروسې څخه د دغه هېواد د حکومت او خلکو ژمنتیا او ملاتړ څرګند کړ. د استرالیا نوي سفیر د سولې په چارو کې د دولت وزیر ته د سولې په اړه په دغه هېواد کې د مېشتو افغانانو د ژمنې پیغام ورساوه او ټینګار یې وکړ چې په دغه هېواد کې مېشت افغانان د سولې او بینالافغاني خبرو اترو هر اړخیز ملاتړ کوي.
په دغه لیدنه کې د سولې په چارو کې د دولت وزیر د افغانستان د سولې له پروسې څخه د استرالیا له ملاتړ مننه وکړه. نوموړي همدا راز د لوړو زده کړو په ګډون په بېلابېلو برخو کې د دغه هېواد د همکارۍ غوښتنه وکړه.
