د استانبول په ناسته کې د ښځو پر ګډون بحث وشو
د ملي مصالحې عالي شورا د ښځینه غړو، د افغانستان اسلامي جمهوریت د مذاکرهکوونکي پلاوي، د سولې په چارو کې د دولت وزارت د بشري حقونو او مدني ټولنې چارو د معینیت او د دغه وزارت د یو شمېر رئیسانو او او سلاکارانو تر منځ د استانبول په راتلونکې ناسته کې د ښځو پر ګډون بحث وشو.
د سولې په چارو کې د دولت وزارت د بشري حقونو او مدني ټولنې د چارو مرستیالې ډاکتر عالمې په دې ناسته کې وویل چې د سولې په چارو کې د دولت وزارت د استانبول په ناسته کې د ښځو د ګډون تسهیلولو لپاره د دغو ناستو سکرتریت پر غاړه لري.
دې زیاته کړه چې د سولې په چارو کې د دولت وزارت د ملي مصالحې عالي شورا او د مذاکرهکوونکي پلاوي د ښځینه غړو په همکارۍ د استانبول په ناسته کې د ښځو د معنادار حضور لپاره پر طرحو او پلانونو کار کوي.
د ناستې ګډونوالو دې ته په کتو سره چې د ټولنې نیم نفوس ښځې جوړوي، د ترکیې په ناسته کې د ښځو پر ګډون او معنادار حضور بحث وکړ. دوی په دې برخه کې د افغانستان اسلامي جمهوریت تر چتر لاندې د نورو جوړښتونو پر هڅو پراخولو او ونډه اخیستلو ټینګار وکړ.
همدا راز د سولې په بهیر کې د ښځو د معنادار ګډون د خوندي کولو لپاره د رسنیو او د افغانستان د سولې بهیر د بهرنیو ملاتړو د رول پر اهمیت خبرې وشوې.
