حکومت د تاوتریخوالي د پام وړ کمښت څرنګوالی په پوره ډول څاري
د جمهور رئیس ځانګړي استازي او د سولې په چارو کې د دولت وزیر عبدالسلام رحیمي د افغانستان لپاره د اروپايي ټولنې له ځانګړي استازي رولانډ کوبیا او ورسره پلاوي سره په خپل کاري دفتر کې وکتل.
په دې لیدنه کې د سولې په چارو کې د دولت وزیر د سولې د بهیر په اړه د سیاسي اجماع د پیاوړتیا او ټینګښت لپاره هڅو ته په اشارې سره وویل چې حکومت د افغانستان د سولې بهیر په داسې ډول مدیریت کوي چې له نورو سیاسي موضوعاتو اغېزمن نهشي.
همدارنګه ده وویل چې حکومت د تاوتریخوالي د پام وړ کمښت څرنګوالی په پوره ډول څاري.
د جمهور رئیس ځانګړي استازي زیاته کړه چې د سولې په چارو کې د دولت وزارت د خبرو اترو پر اړوندو مواردو په جدي ډول کار کوي او همدرنګه د سولې بهیر د پر مخ وړلو لپاره اړین جوړښتونه د جوړېدو په حال کې دي.
عبدالسلام رحیمي وویل چې د سولې بهیر د افغانستان د اسلامي جمهوریت تر مشرۍ لاندې دی او د خپلو شته صلاحیتونو له مخې کار کوي.
رولانډ کوبیا د اروپايي ټولنې په استازيتوب د سولې په بهیر کې د پرمختګونو هرکلی وکړ او اروپايي ټولنه یې د افغانستان د سولې د بهیر ملاتړې وبلله.
