د سولې په چارو کې د همغږۍ د لویې کمېټې جوړول ومنل شول
جمهور رئیس محمد اشرف غني د سولې بهیر د بېلابېلو اړخونو په اړه په تصمیم نیولو کې د همغږۍ رامنځته کېدو لپاره د حکم په صادرولو سره د ځانګړي استازي او د سولې په چارو کې د دولت د وزیر عبدالسلام رحیمي په مشرۍ د سولې په چارو کې د همغږۍ د لویې کمېټې جوړېدل منظورکړل.
د دغه حکم پر اساس د دې کمېټې په غړیتوب کې د ملي امنیت شورا؛ د جمهوري ریاست د چارو ادارې عمومي ریاست؛ د مالیې وزارت؛ د کورنیو چارو وزارت؛ د کرنې، اوبو لګولو او مالدارۍ وزارت؛ د اوبو او انرژۍ وزارت؛ د سرحدونو او قبایلو چارو وزارت؛ د ارشاد، حج او اوقافو وزارت؛ د کډوالو او بېرته راستنېدونکو چارو وزارت؛ د سیمه ییزو ارګانونو خپلواکه اداره؛ د افغانستان د ملي رادیو – تلویزیون عمومي ریاست؛ د سرې میاشتې اجرايه ریاست؛ او د کورنیو چارو وزارت د زندانونو او توقیفخونو عمومي ریاست شامل دي.
د دغه حکم له مخې د سولې په چارو کې د همغږۍ د لویې کمېټې د دارالانشا چارې هم د سولې په چارو کې د دولت وزارت پر غاړه دي.
همدارنګه په دغه حکم کې راغلي چې د دې کمېټې کاري رپوټونه به د جمهوري ریاست عالي مقام ته وړاندې کېږي.
